Asia Alliance Bank Ислом тараққиёт банки гуруҳи билан халқаро ҳамкорликни мустаҳкамламоқда
«Asia Alliance Bank» АТБ Озарбайжоннинг Боку шаҳрида бўлиб ўтган Ислом тараққиёт банки гуруҳи (ИТБ)нинг йиллик йиғилишида иштирок этди.
Тадбир доирасида Asia Alliance Bank ва Халқаро Ислом Савдо-Молия Корпорацияси (ITFC) ўртасида молиялаштиришнинг асосий шартларини назарда тутувчи Terms Letter имзоланди. Мазкур ҳужжат банк томонидан 20 миллион АҚШ доллари миқдоридаги янги молиялаштириш линияси жалб этилишини кўзда тутади.
Мазкур келишувнинг имзоланиши халқаро молия институтларининг Asia Alliance Bank’га бўлган юқори ишончининг навбатдаги тасдиғи бўлиб, банкнинг Ислом тараққиёт банки гуруҳи таркибидаги ташкилотлар билан ҳамкорлигини янада ривожлантириш йўлидаги муҳим қадам ҳисобланади.
Банкнинг Ислом тараққиёт банки гуруҳи таркибидаги ташкилотлар билан ҳамкорлиги 2013 йилдан буён давом этиб келмоқда. Шу давр мобайнида ИТБ гуруҳи томонидан банкка ажратилган молиялаштиришнинг умумий ҳажми 45 миллион АҚШ долларига етди.
Шунингдек, йиллик йиғилиш доирасида банк вакиллари қатор халқаро молия институтлари билан учрашув ва музокаралар ўтказдилар. Жумладан, Turkic Investment Fund вакиллари билан ҳамкорликни кенгайтириш истиқболлари, янги молиялаштириш манбаларини жалб этиш ҳамда Ўзбекистон тадбиркорлиги ва иқтисодиётини қўллаб-қувватлашга қаратилган қўшма ташаббусларни амалга ошириш масалалари муҳокама қилинди.
Asia Alliance Bank халқаро ҳамкорлик алоқаларини изчил кенгайтиришда давом этиб, бизнес ва Ўзбекистон иқтисодиётини ривожлантириш учун янги имкониятлар яратмоқда.
