BAAda neft qazib olish ikki barobarga qisqardi
Eron bilan mojaro va Ho‘rmuz bo‘g‘ozidagi keskinlik sabab Birlashgan Arab Amirliklari neft ishlab chiqarishni keskin kamaytirishga majbur bo‘ldi.
Birlashgan Arab Amirliklarida neft qazib olish hajmi keskin qisqardi. «Reuters» agentligi xabar berishicha, mamlakatda kunlik ishlab chiqarish ikki barobardan ko‘proqqa kamaygan.
Bunday holatga Eron bilan davom etayotgan mojaro va Ho‘rmuz bo‘g‘ozining amalda yopib qo‘yilgani sabab bo‘lgan. Natijada BAAning davlat neft kompaniyasi — «ADNOC» bir qator qazib olish obyektlarida ishni to‘xtatishga majbur bo‘ldi.
Manbalarning aytishicha, ishlab chiqarishni qisqartirish ham quruqlikdagi, ham dengizdagi neft konlariga ta’sir ko‘rsatgan.
Portga hujum
Vaziyatga Fujayra portida sodir bo‘lgan dron hujumi ham ta’sir qilgan. Mazkur port dunyodagi eng yirik neft saqlash markazlaridan biri hisoblanadi.
Hujumdan keyin «ADNOC» portda neft yuklash operatsiyalarini vaqtincha to‘xtatgan. Fujayra porti faoliyati dam olish kunlari sodir bo‘lgan yana bir hujumdan keyin faqat yakshanba kuni qayta tiklangan.
Avvalroq «ADNOC» dengiz konlarida qazib olish hajmi qisqarganini e’lon qilgan edi, biroq manbalar hozirda barcha dengiz konlarida ish to‘liq to‘xtatilganini bildirmoqda.
Bozorga ta’siri
«OPEC» ma’lumotlariga ko‘ra, BAA joriy yil yanvar oyida kuniga qariyb 3,4 million barrel neft qazib olgan. Bu jahon bozoridagi umumiy talabning 3 foizidan ortig‘ini tashkil etadi.
BAA «OPEC»da neft qazib olish hajmi bo‘yicha uchinchi yirik ishlab chiqaruvchi hisoblanadi.
Shu bilan birga, mintaqadagi boshqa davlatlarda ham ishlab chiqarish qisqarmoqda. Saudiya Arabistoni neft qazib olishni taxminan 20 foizga kamaytirgan bo‘lsa, Iroqda bu ko‘rsatkich qariyb 70 foizga tushgan.
Tahlilchilar hisob-kitoblariga ko‘ra, Yaqin Sharqda neft qazib olishning umumiy qisqarishi kuniga 7–10 million barrelga yetmoqda. Bu jahondagi umumiy talabning taxminan 7–10 foiziga teng.
