Бир ойлик қисқаришдан сўнг аҳоли омонатлари яна фаол ўсди
Ўзбекистон банкларининг кредит портфели октабр ойида 10,6 трлн сўмлик ўсиши кузатилиб умумий 592,9 трлн сўмга етган. Депозитлар эса 6,1 трлн сўмга ошди.
Марказий банк 2025-йилнинг 1 ноябр ҳолатига кўра тижорат банкларининг кредит ва депозит тўғрисидаги ҳисоботини эълон қилди.
Қайд қилинишича, Ўзбекистон банкларининг жами кредит портфели 592,9 трлн сўмга етган. Шундан 213,9 трлн сўм жисмоний шахсларга тегишли бўлса, 379,1 трлн сўми юридик шахслар томонидан олинган.
Давлат банклари орасида кредит бўйича етакчиликни 104,8 трлн билан Ўзмиллийбанк эгаллаган. Ундан кейин Агробанк (80 трлн сўм), Ўзсаноатқурилишбанк (66,4 трлн сўм) ва Асакабанк (42,4 трлн сўм) туради.
Хусусий, яъни давлат улуши бўлмаган банклар орасида эса Ипотека ва Капитал банкнинг кредит портфели энг юқори кўрсаткичда, яъни иккаласи ҳам 35 трлн сўмдан юқори.
Депозит
Октабр ойи давомида банкларнинг депозит портфели 6,1 трлн сўмга ортиб, 377,6 трлн сўмга етди. Аҳоли омонатлари 4,5 трлн сўмга ортиб, 148,6 трлн сўмга етди.
Энг кўп депозит жамғарган банклар — Ўзмиллийбанк (47,8 трлн сўм), Капитал банк (40,7 трлн сўм) ва Агробанк (29,7 трлн сўм) бўлган.
Октябр ойида депозитларни энг кўп жалб қилган банклар орасида Асакабанк биринчи ўринни эгаллади — ойлик ўсиш 2,3 трлн сўмни ташкил қилди. Ундан кейин Алоқабанк ва Капиталбанк жойлашиб, ҳар бири 1,1 трлн сўм миқдорида янги депозит жалб этди.
