«Chakanapay» иловаси ёпилмоқда
Илова икки йилдан буён фойдаланувчиларга 10 млн сўмгача фоизсиз пул ўтказмалари хизматини таклиф қилиб келаётган эди.
«Agrobank» экотизимининг бир қисми сифатида фаолият олиб борган «Chakanapay» фаолияти тўхтатилмоқда.
«Chakanapay ёпилмоқда. Биз сизнинг ишончингизни қадрлаймиз ва ишончли воситаларимиздан фойдаланишда давом этишингизни истаймиз. Шунинг учун сизни узоқ вақтдан бери барқарор ишлаётган асосий экотизимимиз «Agromobile»га таклиф қиламиз», — дейилган илова билдиришномасида.
«Agrobank» «Chakanapay» иловаси нима сабабдан ёпилаётгани ҳақида изоҳ бермади. Банк фақатгина «Chakana» маркетплейси ҳамда «Open» муддатли тўлов тизимида ҳам техник ишлар олиб борилаётганини маълум қилди.
Маълумот учун, 15 январ куни «Agrobank» акциядорларининг навбатдан ташқари йиғилишида «Open Bank» акцияларини сотиб олиш масаласи кўриб чиқилиб, бу бўйича қарор қабул қилинди. Йиғилиш протоколига кўра, акциялар қонунчиликда белгиланган тартибда сотиб олинади ва ушбу жараённи амалга ошириш учун махсус «йўл харитаси» ишлаб чиқилган.
Маълумотларга кўра, мазкур банк илгари «Smart Bank» номи билан фаолият юритган. 2022 йил декабрида Марказий банк томонидан «Smart Bank» акциядорлик жамиятига банк фаолиятини амалга ошириш учун лицензия берилган.
2023 йил февралида эса банкнинг ягона акциядори «Leader Finance» МЧЖ экани маълум бўлган. Ушбу компаниянинг ягона таъсисчиси «Agrobank» ҳисобланган. Шу тариқа, давлат банки бўлган «Agrobank» мазкур рақамли банк лойиҳасининг ҳам эгаси ҳисобланган.
2025 йил бошида «Future Open Technology Group» АЖ «Smart Bank»нинг 90,2 фоиз акцияларини 451 млрд сўм эвазига сотиб олган. Шу йилнинг 17 июн куни янги акциядорлар йиғилишида банкни ребрендинг қилишга қарор қилиниб, унинг номи «Open Bank» деб ўзгартирилган.
Ҳозирги маълумотларга кўра, «Open Bank» акцияларининг 85,07 фоизи «Future Open Technology Group»га, 10 фоизи Комилхўжа Султоновга, 4,93 фоизи эса Зафар Адиловга тегишли. Bank 2025 йилни 8,2 млрд сўм соф фойда билан якунлаган.
