Chevron «Lukoil»нинг хорижий активларини сотиб олиши мумкин
АҚШнинг йирик нефт компанияси «Lukoil»га тегишли санкцияга учраган айрим активларини сотиб олиш имкониятини ўрганмоқда. Маълумотларга кўра, Chevron «Lukoil»нинг фақат ўзи билан амалдаги лойиҳалар орқали боғлиқ бўлганларини кўриб чиқмоқда.
АҚШнинг Chevron нефт гиганти Россиянинг АҚШ ва Буюк Британия санкцияларига тушган «Lukoil» компаниясининг хориждаги бир қанча активларини сотиб олиш масаласини кўриб чиқмоқда. Бу ҳақда Reuters агентлиги хабар берди.
Манбаларга кўра, Chevron компанияси ҳозирча «Lukoil»нинг барча активларига эмас, балки амалий жиҳатдан ўзи иштирок этаётган лойиҳалар билан боғлиқ активларга қизиқиш билдирмоқда.
Қайд этилишича, Chevron ҳам, «Lukoil» ҳам Қозоғистондаги Карачаганак ва Тенгиз конларидан нефт қазиб олади. Шунингдек, «Lukoil» Нигерия шельфидаги ОМЛ-140 лойиҳасида улушга эга, у ерда операторликни Chevron бажаради.
Эслатиб ўтамиз, аввалроқ АҚШнинг «Carlyle» инвестфонди санкция таҳдиди остида қолган «Lukoil»нинг хорижий активларини сотиб олиш имконини ўрганаётганлиги ҳақида хабар берган эдик. Аммо манбаларга кўра, Carlyle ҳали битимни ўрганишнинг дастлабки босқичида қолмоқда ва аниқ қарор қабул қилинмаган.
Маълумот учун, «Lukoil» Россия компаниялари орасида халқаро бозорда энг кенг иштирок этувчи корпорация ҳисобланади. Компания Европадаги бир нечта нефтни қайта ишлаш заводларида улушга эга, шунингдек Ироқ, Қозоғистон ва бошқа мамлакатлардаги йирик конларда иштирок этади. «Lukoil» АЁҚШлари АҚШ, Белгия ва Руминияда ҳам фаолият юритади.
2025 йил октябр ойида АҚШ ва Буюк Британия «Lukoil», «Роснефт» ва уларга қарашли 34 та шўба компанияга нисбатан янги санкциялар жорий қилган эди. Бу чоралар Россиянинг Украинага қарши давом этаётган уруш ҳаракатлари фонида қабул қилинган. Санкциялардан сўнг «Lukoil» хорижий активларини сотиш бўйича қарор қабул қилди.
Уларни харид қилишга илк даъвогар сифатида Швейсариянинг Gunvor трейдери майдонга чиққан. Бироқ Gunvor нинг асосчиларидан бири Россия президенти Владимир Путинга яқинлиги билан танилган Геннадий Тимченко экани сабабли, АҚШ битимга розилик бермади. Вашингтон Украинадаги уруш тугамагунча ушбу компанияга хорижда бизнес юритиш учун лицензия берилмаслигини билдирди.
Аввалроқ Абу-Даби Миллий нефт компанияси (Abu Dhabi National Oil Company, ADNOC) «Lukoil»нинг Ўзбекистондаги активларини сотиб олишга қизиқаётгани ҳақида хабар берган эдик.
