Давлат маблағларини талон-тарож қилган ИИВ собиқ мансабдорлари ҳибсга олингани айтилмоқда

Ижтимоий тармоқларда тарқалган ва расман тасдиқланмаган хабарларга кўра, Ўзбекистон Ички ишлар вазирининг собиқ ўринбосари, Жамоат хавфсизлиги департаментининг собиқ бошлиғи Бекмурод Абдуллаев ҳамда Жазони ижро этиш департаментининг собиқ раҳбари Рустам Турсунов ўтган ойда ҳибсга олинган. Бу икки юқори мулозим йирик миқдорда «ишониб топширилган давлат мол-мулкни ўзлаштириш» (яъни, «растрата») да айбланмоқда.

Vaqt.uz вазиятга ойдинлик киритиш мақсадида Ички ишлар вазирлиги матбуот хизматига мурожаат қилди. Бироқ, бу борада аниқ жавоб ололмади.

Бекмурод Абдуллаев ва Рустам Турсунов 3 ноябр куни Ўзбекистон президенти қарори билан лавозимидан бўшатилгани ҳақида Президент матбуот котиби Шерзод Асадов маълум қилган эди.

Бекмурод Абдуллаев 2021 йил апрелидан буён Ички ишлар вазирининг ўринбосари — Жамоат хавфсизлиги департаменти бошлиғи лавозимида фаолият юритиб келган. Ушбу тайинловга қадар у Ўзбекистон Республикаси Миллий гвардияси қўмондонининг жамоат хавфсизлигини таъминлаш бўйича биринчи ўринбосари сифатида ишлаган.

Рустам Турсунов эса 2021 йил феврал ойидан бери Ички ишлар вазирлиги ҳузуридаги Жазони ижро этиш департаментига раҳбарлик қилган.

Қайд этиб ўтиш керак, Президен Шавкат Мирзиёев 2025 йил 26 декабр куни Олий Мажлис ва Ўзбекистон халқига қилган Мурожаатномасида коррупцияга қарши курашни давлат сиёсати даражасида кескин кучайтиришини маълум қилган эди. Президент коррупционер амалдорларни ислоҳотларга хиёнатда айблаб, 2026 йилда мамлакатда коррупцияга қарши «фавқулодда ҳолат» эълон қилган эди.

Шунингдек, давлат раҳбари лавозим ва унвон ҳеч кимни қонун олдида жавобгарликдан озод қилмаслигини қатъий таъкидлаган эди.