Deutsche Bank олтин нархи бўйича прогнозини кескин оширди

2026 йилда олтиннинг троя унцияси 4450 долларгача қимматлашиши мумкинлиги ҳақидаги янги прогноз дунё молия бозорларида кескин қизиқиш уйғотди. Reuters агентлигининг ёзишича, дунёдаги йирик банклардан бири — Deutsche Bank ўз ҳисоботини янги маълумотлар асосида қайта кўриб чиққач, олтинни тарихий даражаларга етказиши мумкин бўлган фундаментал омиллар мустаҳкамланмоқда. Банк аввалги прогноз — 4000 доллар ўрнига олтинни 4450 доллар этиб белгилади.

Янгиланган ҳисоботга кўра, 2026 йилда олтин нархи 3950–4950 доллар оралиғида савдоланиши мумкин. Эътиборли жиҳат — юқори чегара COMEX биржасида 2026 йил декабр фючерслари нархидан тахминан 14 фоиз юқори. Бу олтинга нисбатан тез суръатда ўсувчи ишончни акс эттиради. Deutsche Bank таҳлилчиларига кўра, бозордаги ушбу динамикани икки асосий омил қўллаб турибди.

Биринчиси — инвестицион маблағлар оқими барқарорлашгани. Хусусий инвесторлар ҳам, йирик институтционал фондлар ҳам олтинни яна хавфсиз актив сифатида кўришни бошлади. Иккинчи омил — марказий банкларнинг кўплаб харидлари. Банкларнинг олтин сотиб олиш стратегияси «барқарор» деб баҳоланмоқда: регуляторлар бу жараённи тўхтатиш ниятида эмас.

2024–2025 йилларда айниқса Глобал Жануб мамлакатлари ва АҚШ билан муносабати кескин давлатлар олтинга қизиқишини кескин оширди. Бу жараён долларсизлаштиришнинг амалий кўриниши сифатида изоҳланмоқда. Олтиннинг афзаллиги — уни эмиссия қилиб бўлмайди, SWIFT орқали блокировка қилиб бўлмайди ва санкция хавфларидан ҳимоя воситаси сифатида ишлайди. Марказий банклар томонидан қимматбаҳо металга бўлган рекорд талаб геосиёсий ноаниқликлар кучайган бир даврда активларни сақлашнинг энг хавфсиз йўли сифатида қабул қилинмоқда.