Дмитрий Козак чет элга кетишидан аввал Путинга урушни танқид қилиб мактуб ёзгани айтилмоқда

Россия президенти маъмурияти раҳбари ўринбосари лавозимидан сентябр ойида истеъфога чиққан Дмитрий Козакнинг кетиши ортида жиддий сиёсий моҳият тургани маълум бўлмоқда. «Агентство» нашри манбаларига кўра, Козак ишдан бўшатилишидан аввал Владимир Путинга шахсий мактуб ёзиб, Россиянинг Украинага қарши босқинини ўта кескин танқид қилган.

Манбалар айтишича, Козак икки ҳужжат тайёрлаган: расмий ариза ва Путинга йўлланган шахсий мактуб. Айни шу мактубда у ҳужум қарорини «стратегик хатолик» сифатида атаган ва унинг оқибатлари Россияни узоқ йиллар давомида заифлаштиришини таъкидлаган.

Шундан сўнг Козак бир неча марта чет элга чиққан. Тўртта манбанинг тасдиқлашича, у айниқса Исроилда кўп бўлган, аммо бунга хавфсизлик эмас, соғлиги билан боғлиқ масалалар сабаб бўлган. У доим Россияга қайтиб кириб чиқаётгани ҳам қайд этилган.

Козак Владимир Путин атрофидаги энг яқин амалдорлар орасида Украинадаги урушни очиқ танқид қилган ягона шахс сифатида тилга олинади. The New York Times маълумотларига кўра, у бу йил президентга бир неча бор урушни тўхтатиш ва мамлакат ичида ислоҳотлар ўтказишни таклиф қилган. Reuters ҳам Козак 2022 йилги ҳужум қарорига қарши чиққанини ёзган эди.

Козакнинг сиёсий карераси Путин билан Ленинград давридан бошланган. У ҳукумат аппарати раҳбари, вазир, Кавказ бўйича президент вакили, бош вазири ўринбосари ва Кремл администрацияси раҳбарининг ўринбосари лавозимларида ишлаган. Урушдан олдин эса Кремлда ЛХР ва ДХР билан ишлашни мувофиқлаштирган.

Манбаларнинг таъкидлашича, у Украина масаласидан четлатилгандан кейин амалда иш юритмаган, Молдова ва Абхазиядаги Кремл стратегияси ҳам самарасиз бўлгач, унинг таъсири янада камайган. 18 сентябрдаги истеъфодан сўнг Козакка ҳеч қандай янги лавозим берилмади.