Доналд Трамп: «АҚШ Венесуэлани янги ҳокимият шакллантирилгунча бошқаради»
Доналд Трамп АҚШ Венесуэлада хавфсиз ва назоратли ҳокимият транзити таъминлангунча мамлакатни вақтинча бошқаришини маълум қилди.
АҚШ президенти Доналд Трамп Венесуэлада ўтказилган ҳарбий операциядан сўнг мамлакатда ўтиш даври бошқаруви жорий этилишини маълум қилди. Унинг айтишича, АҚШ янги ҳокимият шаклланиб, хавфсиз ва қонуний транзит таъминлангунига қадар Венесуэлани бошқаради.
Трамп бу ҳақда ҳарбий операцияга бағишланган брифингда баёнот берди. Унинг сўзларига кўра, 3 январ куни АҚШ махсус кучлари Венесуэла етакчиси Николас Мадуро ва унинг рафиқаси Силия Флоресни қўлга олган. Президент Мадурони «нолегитим диктатор» деб атаб, у АҚШ суди олдида наркотрафик айбловлари билан жавоб беришини билдирди.
Доналд Трамп матбуот анжуманида Венесуэлага қарши ҳарбий операция вақтида собиқ президент Николас Мадуро қочишга уринганини ҳам маълум қилди. Унинг айтишича, Мадуро хавфсиз жойга етиб олишга ҳаракат қилган, бироқ бунга улгурмаган.
«Отишмалар бўлган. У қочмоқчи эди, бункерга етиб олишга уринган, аммо эшиккача етиб бора олмади. Бизга унинг ёнига кириш учун эшикни портлатишга 47 сония керак бўлди», — деди Трамп.
Маълум қилинишича, Доналд Трамп операцияни бошлаш буйруғини 2 январ куни АҚШнинг шарқий вақти билан соат 22:46 да берган. АҚШ қўшинлари эса тахминан соат 02:00 атрофида Каракасга етиб борган.
Трамп ўтиш даври қанча давом этишини аниқ айтмади. Унинг таъкидлашича, ҳозирда Вашингтон ҳуқуқий жиҳатдан тўғри ва халқаро қонунларга мос келадиган ҳокимият алмашинуви устида иш олиб бормоқда. «Биз бошқа кучлар аралашиб, вазият яна ўша кўп йиллик ҳолатга қайтиб қолишини истамаймиз», — деди у.
АҚШ президенти Венесуэла мухолифати етакчиси, Нобел тинчлик мукофоти соҳиби Мария Мачадони янги давлат раҳбари сифатида кўрмаслигини ҳам билдирди. Унинг сўзларига кўра, Мачадо мамлакат ичида етарли қўллаб-қувватловга эга эмас.
Шунингдек, Трамп АҚШ давлат котиби Марко Рубио Венесуэла вице-президенти Делси Родригес билан телефон орқали мулоқот қилганини, у эса АҚШ билан ҳамкорлик қилишга рози бўлганини айтди.
Трамп Венесуэла халқини «ҳимоя қилиш», тинчлик, хавфсизлик ва адолатни таъминлашни ваъда қилди. У АҚШ нефт инфратузилмасини қайта тиклаш устида иш олиб боришини ҳам таъкидлади.
Маълум қилинишича, «Яримтун болғаси» деб номланган операция давомида АҚШ 150 та самолётдан, жумладан F-22, F-35 ва F/A-18 туридаги жангчи ҳаво кемаларидан фойдаланган.
АҚШ Қўшма штаб бошлиқлари қўмитаси раҳбари генерал Дэн Кейннинг айтишича, америкалик ҳарбийлар президент саройи ҳудудида ишончли ҳаракат қилган ва Николас Мадурони қўлга олган. Авиация Венесуэла ҳаво мудофааси тизимларини йўқ қилиш орқали махсус кучларнинг ҳаракатини таъминлаган. Операция давомида битта ҳарбий вертолёт шикастланган.
