Dubayda tankerga hujum: neft narxlari nega keskin oshdi?
Fors ko‘rfazida tankerga dron hujumi neft narxlarini oshirdi va bozorlarda xavotirlarni kuchaytirdi.
«Bloomberg» yozishicha, 31-martga o‘tar kechasi Eron droni Dubay sohillari yaqinida to‘liq yuklangan Kuvayt neft tankerini nishonga olgan. Bu ma’lumotni «Financial Times» ham Britaniyaning «UKMTO» markaziga tayanib tasdiqlagan.
«Bloomberg» ma’lumotiga ko‘ra, gap «Al-Salmi» nomli yirik neft xomashyosini tashuvchi tanker haqida bormoqda. U Kuvayt bayrog‘i ostida yurgan va Dubay portida, amirlikdan shimoliy-g‘arbiy yo‘nalishda 31 dengiz mili (taxminan 57 km) masofada yakorda turgan. Zarba mahalliy vaqt bilan yarim tundan keyin berilgan. Dron korpusga shikast yetkazib, bortda yong‘in chiqishiga sabab bo‘lgan, deb ma’lum qildi «Kuwait Petroleum» («Bloomberg» iqtibosi). Kema so‘nggi kunlarda uzatgan signallarga ko‘ra, Xitoyning «Qingdao» shahriga yo‘l olgan.
Keyinchalik «Dubai Media Office» «X» tarmog‘ida xabar berib, tankerdagi yong‘in o‘chirilgani, neft oqib chiqmagani va «Al-Salmi»dagi barcha 24 ekipaj a’zosi xavfsiz ekanini ma’lum qildi.
Hujumga uchragan kemalar
Shu tariqa, «Financial Times» hisob-kitoblariga ko‘ra, fevral oxirida boshlangan urushdan beri Fors ko‘rfazi va uning atrofida hujumga uchragan kemalar soni kamida 23 taga yetgan. «Al-Salmi»ga qilingan hujum bir haftadan ortiq vaqt ichida tasdiqlangan ilk shunday holat bo‘lgan. «Bloomberg» ma’lum qilishicha, seshanba tongi holatiga ko‘ra, hujum sodir bo‘lgan yakor hududida turli turdagi 400 dan ortiq kema bo‘lgan.
Bu hodisa fonida «Brent» markali neft 31-mart kuni barreli uchun 115,6 dollargacha ko‘tarildi. Biroq keyinchalik o‘sish sekinlashdi, nashr vaqtida may fyucherslari 113,5 dollar atrofida savdo qilinmoqda. Bu «The Wall Street Journal» manbalariga ko‘ra, AQSH prezidenti Donald Tramp yordamchilariga Eronga qarshi harbiy kampaniyani yakunlashga tayyorligini bildirgani haqidagi xabarlar fonida yuz berdi (hozircha Ho‘rmuz bo‘g‘ozi orqali kema qatnovi masalasi hal etilmagan).
«WTI» rusumli neft fyucherslari ham 31-mart kuni kun davomida 106,86 dollargacha ko‘tarilib, nashr paytiga kelib 102,93 dollar darajasida qayd etilgan.
