Дунё тобора хавфлилашиб бораётганини айтган Путин Мадуро ва Эрон борасида жим – Reuters
Путин Ғарбнинг «кучли бўлганим учун ҳақман» қабилидаги сиёсатини кескин танқид қилди, бироқ Доналд Трампнинг номини очиқ айтишдан қочди.
Россия президенти Владимир Путин бугун, 15 январ куни халқаро вазият ёмонлашгани ва дунё тобора хавфли жойга айланиб бораётганини айтди, бироқ Венесуэла ва Эрон атрофидаги вазият юзасидан лом-мим демади. Бу ҳақда Reuters хабар берди.
Путин АҚШ томонидан Венесуэла раҳбари Николас Мадуронинг ҳокимиятдан ағдарилиши, Эрондаги намойишлар ёки АҚШ президенти Доналд Трампнинг Гренландияга нисбатан таҳдидлари юзасидан ҳозирча бирон бир оммавий изоҳ бермаган.
«Халқаро майдондаги вазият тобора кескинлашиб бормоқда — менимча, бу борада ҳеч ким баҳслашмаса керак — узоқ йиллик низолар кучаймоқда ва янги жиддий қаршилик нуқталари пайдо бўляпти», — деди Россия раҳбари жилмайиб.
Кремлда ишонч ёрлиқларини топширган янги элчилар олдидаги нутқида Путин АҚШ ёки Трамп номини очиқ-ойдин тилга олмади.
«Биз «кучли бўлганим учун ҳақман» қабилида иш тутиб, ўз иродасини сингдиришни, бошқаларга ақл ўргатишни ва буйруқ беришни ўзига эп кўрадиганларнинг монологини эшитяпмиз», — деди Путин.
У Россиянинг Европада янги хавфсизлик архитектурасини яратиш бўйича таклифларини муҳокама қилишга чақирди.
«Умид қиламизки, ушбу зарурат эртами-кечми англаб етилади. Унга қадар эса Россия ўз мақсадларини изчил амалга оширишда давом этаверади», — деди президент.
Иккинчи жаҳон урушидан кейинги Европадаги энг қонли тўқнашув бўлган Украинадаги уруш Россия ва Ғарб ўртасида 1962 йилги Кариб инқирозидан бери кузатилмаган энг йирик қарама-қаршиликни келтириб чиқарди.
