Дунёда қайси давлатлар олтин қазиб олишда етакчи?

Жаҳон олтин бозори ҳали ҳам асосан чекланган йирик давлатлар қўлида шаклланмоқда. Хитой, Россия ва Австралия энг катта олтин қазиб олувчи давлатлар сифатида етакчилик қилади, бу ҳақда Visual Capitalist томонидан тайёрланган инфографикада кўриш мумкин.

Маълумотларга кўра, Хитой 380,2 тонна олтин қазиб олиш ҳажми билан дунёда биринчи ўринни эгаллаган. Бу жаҳон бўйича умумий олтин қазиб олиш ҳажмининг 10 фоиздан ортиғини ташкил этади. Шунингдек, Хитой нафақат энг йирик ишлаб чиқарувчи, балки дунёдаги энг катта олтин истеъмолчиларидан бири ҳам ҳисобланади.

330 тонна олтин қазиб олиш ҳажми билан Россия санксиялар ва геосиёсий босимларга қарамай иккинчи ўринни сақлаб қолган. Австралия эса 284 тонна ишлаб чиқариш билан учинчи ўринда турибди. АҚШ 158 тонна, Канада 202,1 тонна ва Мексика 140,3 тонна ишлаб чиқариш билан энг йирик етказиб берувчилар қаторида.

Африка эса дунё олтин бозорида тобора муҳим марказга айланиб бормоқда. Қитъа мамлакатлари жами олтин ишлаб чиқаришнинг қарийб тўртдан бир қисмини таъминлайди. Африканинг энг йирик ишлаб чиқарувчиси Гана бўлиб, у 140,6 тонна ишлаб чиқарди. Мали ва Жанубий Африка (ЮАР) ҳам етакчи ўринда турибди.

Бошқа Африка давлатлари, Буркина-Фасо, Судан, Танзания ва Кот-дъИвуарда ҳам сўнгги ўн йилда олтин ишлаб чиқариш ҳажми сезиларли ошди, бу асосан тоғ-кон соҳасига инвеститсиялар кўпайгани билан изоҳланади. Шунга қарамай, айрим минтақалардаги сиёсий беқарорлик ва хавфсизлик муаммолари қазиб олиш жараёнларига таъсир кўрсатмоқда. Шу билан бирга, Африка халқаро тоғ-кон компаниялари учун энг истиқболли бозорлардан бири бўлиб қолмоқда.

Марказий Осиёда Ўзбекистон 129,1 тонна олтин қазиб олиш билан минтақанинг энг йирик ишлаб чиқарувчиси ҳисобланади ва бутун дунё бўйича 10-ўринни эгаллайди. Минтақадаги иккинчи ўринни Қозоғистон эгаллаб, 87 тонна олтин қазиб олган.

Дунёда олтин қазиб олиш бўйича ТОП-10 давлат:

1.Хитой – 380,2 тонна;

2.Россия – 330,0 тонна;

3.Австралия – 284,0 тонна;

4.Канада – 202,1 тонна;

5.АҚШ – 158,0 тонна;

6.Гана – 140,6 тонна;

7.Индонезия – 140,1 тонна;

8.Мексика – 140,3 тонна;

9.Перу – 136,9 тонна;

10.Ўзбекистон – 129,1 тонна.