Дунёнинг энг бой одами Украинани Россияга ён беришга чақирди

Америкалик миллиардер ва «SpaceX» асосчиси Илон Маск Украинадаги урушни тугатиш фақат Россияга маълум ён беришлар орқали мумкинлигини билдирди. Бу ҳақда у «The Economist» нашрига берган интервюсида гапирди.

Маскнинг фикрича, Россия қўшинларининг Украина ҳудудини тўлиқ тарк этишини кутиш ҳақиқатдан йироқ.

«Мен анча вақтдан бери тинчлик тарафдориман. Бир неча йил олдин Россияга муайян ён беришлар бериш зарурлигини ёзган эдим. Бу менинг Россияни қўллаб-қувватлашимни англатмайди, шунчаки прагматик ёндашганман», — деди у.

«Мен тинчлик тарафдориман»

Илон Маскнинг таъкидлашича, Украина фронтида вазият сўнгги икки-уч йил давомида деярли ўзгармаган ва ҳар куни кўплаб одамлар ҳалок бўлмоқда.

Миллиардер, шунингдек, «фронт чизиғида одамлар ҳалок бўлаётган бир пайтда, ҳашаматли жойларда етти хил таомдан иборат кечки овқат тановул қиладиган ҳамда Россиянинг чекиниши шартлиги ҳақида жар солиб, аммо ўзлари у ерга боришни хаёлига ҳам келтирмайдиган гердайган дипломатлар» унинг ғазабини қўзғаётганини айтган.

Маск бундан аввал ҳам шундай фикр билдирган

Бу Илон Маскнинг Украинадаги уруш бўйича биринчи баёноти эмас. У аввал ҳам можарони музокаралар орқали ҳал қилиш зарурлигини таъкидлаган.

Жумладан, 2025 йил март ойида «Fox News» телеканалига берган интервюсида у уруш тинчлик келишуви билан якунланишини айтган ва АҚШ президенти Доналд Трампнинг можарони ҳал қилиш иш бўйича саъй-ҳаракатларини «иш бериши аниқ бўлган ягона режа» деб баҳолаган.