Энг йирик криптовалюта биржаси «Binance»га қарши суриштирув бошланди

АҚШ Сенати дунёдаги энг йирик криптовалюта биржаларидан бири бўлган «Binance» фаолияти юзасидан расмий текширув бошлади. Сенатор Ричард Блументал биржа раҳбариятидан санкциялар ва комплаенс талабларига риоя этилиши билан боғлиқ ички ҳужжатларни тақдим этишни сўраган.

Сенатнинг тергов бўйича доимий кичик қўмитаси «Binance» санкцияланган шахслар, террорчилик ташкилотлари ва бошқа жиноий тузилмаларнинг биржадан фойдаланишининг олдини олиш бўйича мажбуриятларини қандай бажарганини аниқламоқчи.

Текширувда асосан қуйидаги масалалар ўрганилади:

— «Binance» Эрондаги санкцияланган ташкилотлар билан операциялар амалга оширганми?

— биржа Россия нефтини ташишда фойдаланилаётган «соя флоти» билан боғлиқ операцияларга кўмаклашганми?

— Эронга ўтказилгани айтилган 1,7 миллиард долларлик криптоактивлар билан боғлиқ операциялар қандай амалга оширилган?

— «Binance» санкцияланган шахслар ва ташкилотларнинг биржадан фойдаланишини тўсиш бўйича талабларни бажарганми?

— платформа орқали пул ювиш ёки терроризмни молиялаштиришга йўл қўйилганми?

— «Binance»нинг «Hexa Whale» ва «Blessed Trust» орқали пул ювиш ҳамда Эрон ҳукуматига алоқадор ташкилотлар билан савдоларга кўмаклашгани ҳақидаги гумонлар асослими?

— биржа ходимларининг санкциялар билан боғлиқ хавфлар ҳақидаги огоҳлантиришлари раҳбарият томонидан эътиборсиз қолдирилганми?

— қоидабузарликлар ҳақида хабар берган ходимларга босим бўлганми ёки йўқми?

Трамп оиласи билан алоқадорлик

Текширувнинг яна бир йўналиши «Binance» ва Трамп оиласига яқин «World Liberty Financial» ўртасидаги муносабатлардир. Блументал биржа ушбу ҳамкорлик орқали сиёсий таъсирга эга бўлиш ва ўз фаолияти учун жавобгарликдан қочишга уринган бўлиши мумкинлигини билдирган.

«Binance ноқонуний фойдаланишнинг олдини олиш ўрнига, лоббичилик ва президент Трамп ва унинг махсус элчиси Стив Виткоффнинг ўғилларига тегишли бўлган World Liberty Financial (WLFI) криптовалюта фирмаси билан молиявий ҳамкорлик орқали жавобгарликдан қочишга ва Оқ уйга таъсир ўтказишга ҳаракат қилди», — дейилади Блументалнинг мактубида.

Мактубда келтирилишича, «Binance» WLFI'нинг стейблкойни USD1 учун муҳим инфратузилмага айланган. WLFI ва БААдаги тадбиркор Таҳнун бин Заид Ол Наҳаён ўртасидаги дастлабки ҳамкорликдан кейин USD1 токенларининг тахминан 85 фоизи «Binance»да сақланган. Бу эса Трамп оиласининг крипто лойиҳаларини биржа билан янада яқин боғлаган.

Текширув доирасида «Binance»дан 2026-йил 6-мартгача бўлган операциялар, ички ёзишмалар ва комплаенс ходимларига оид ҳужжатлар талаб қилинган. Агар текширув натижасида қоидабузарликларни тасдиқловчи далиллар аниқланса, бу «Binance» ва умуман криптовалюта платформалари устидан назорат масаласини янада кучайтириши мумкин