Эронда норозилик намойишлари бир ҳафтадан бери тўхтамаяпти

Эронда оммавий норозилик намойишлари бир ҳафтадан бери давом этмоқда. Акциялар камида 22 та вилоятини қамраб олган бўлиб, минглаб одамлар иштирокида ўтмоқда. Бу ҳақда «Iran International» хабар бермоқда.

Маълумотларга кўра, етти кунлик намойишлар давомида камида саккиз киши ҳалок бўлган, 40 нафардан ортиқ фуқаро эса хавфсизлик кучлари томонидан қўлланилган махсус воситалар ва ўқ-дорилар сабаб яраланган. Қурбонлар орасида Лурдагон шаҳрилик 20 ёшли Сажжод Валоманиш ва 28 ёшли стажёр-юрист Аҳмадризо Омоний бор. Нашрнинг ёзишича, ҳалок бўлганларнинг оилалари ҳукумат томонидан босимга учраган.

Эроннинг олий раҳбари Али Хоминаий намойиш иштирокчиларини «исёнчилар» деб атаб, уларни қаттиққўллик билан бостиришга чақирган. Шу билан бирга, ўқитувчилар касаба уюшмалари ҳамда Теҳрон бадиий университети талабалари ҳуқуқни муҳофаза қилувчи органларга мурожаат қилиб, халққа қарши чиқмасликка ва тинч намойишларни қўллаб-қувватлашга чақирди.

Норозилик акциялари Теҳрон, Машҳад, Қум, Илом ва бошқа шаҳарларда бўлиб ўтмоқда. Намойишчилар Ислом республикаси байроқларини олиб ташлаб, ҳукуматга қарши ва монархияни қўллаб-қувватловчи шиорларни айтмоқда. Теҳрон бозори савдогарлари янги акциялар ўтказилишини эълон қилган, ижтимоий тармоқларда тарқалаётган видеолар эса одамлар зўравонликка қарамасдан кўчаларга чиқишда давом этаётганини кўрсатмоқда.

Халқаро жамоатчилик ҳам вазиятга муносабат билдирди. АҚШ Эронда эркинлик талаб қилаётган фуқароларни қўллаб-қувватлашини тасдиқлаган, БМТ эса Эрон ҳукуматини сўз эркинлиги ва тинч йиғилиш ҳуқуқларига ҳурмат билан қарашга чақирган.