Эронда «қаршилик» қурбонлари учун уч кунлик умуммиллий мотам эълон қилинди

Эрон ҳукумати мамлакатда давом этаётган оммавий норозиликлар фонида ҳалок бўлганлар хотирасига уч кунлик умуммиллий мотам эълон қилди. Бу ҳақда «IRIB» давлат телерадиокомпанияси маълум қилди.

Расмий баёнотда ҳалок бўлганлар «АҚШ ва сионистик режимга қарши миллий қаршилик шаҳидлари» сифатида таърифланди. Теҳрон расмийларига кўра, мотам мамлакат бўйлаб барча давлат муассасаларида ўтказилади.

Эронда оммавий намойишлар 2025 йил декабр ойи охирида миллий валюта — риёлнинг кескин қадрсизланиши ортидан бошланган. Асосий норозилик сабаблари валюта курсининг беқарорлиги, улгуржи ва чакана нархларнинг жадал ўсиши бўлди. Ижтимоий тармоқларда Теҳрон ва бошқа шаҳарлардаги намойишлар акс этган видеолар кенг тарқалди.

Вазият 1979 йилда ағдарилган Эрон шаҳаншоҳининг ўғли Ризо Паҳлавийнинг чиқишларидан сўнг янада кескинлашди. Шу кундан бошлаб намойишлар кучайди, мамлакатда интернет алоқаси чекланди. Айрим шаҳарларда акциялар полиция билан тўқнашувларга айланиб, амалдаги сиёсий тузумга қарши шиорлар билан ўтди. Ҳалок бўлганлар ва яраланганлар ҳам намойишчилар, ҳам хавфсизлик кучлари орасида қайд этилди.

«Reuters» агентлиги АҚШда жойлашган ҳуқуқни ҳимоя қилувчи ташкилотларга таяниб, норозиликлар бошланганидан бери камида 466 киши ҳалок бўлганини хабар қилди. Расмий Теҳрон бу рақамларга изоҳ бермаган, бироқ аввалроқ 30 нафар хавфсизлик ходими ҳалок бўлганини маълум қилган. Шу билан бирга, «Tasnim» агентлиги «террорчилар» деб аталган намойиш иштирокчилари орасида ҳам қурбонлар кўплигини билдирган.

Эрон президенти Масъуд Пизишкиён халққа мурожаатида иқтисодий ислоҳотлар давом эттирилишини ва ижтимоий-иқтисодий муаммолар ҳал этилишини ваъда қилди. Шу билан бирга, у АҚШ ва Исроилни тартибсизликларни ташкил этишда айблаб, фуқароларни «радикал гуруҳлар ҳаракатлари билан қонуний талабларни алмаштиришга йўл қўймаслик»ка чақирди.