Эронда валюта инқирози оммавий норозиликларни кучайтирди
Эронда валюта инқирози ва нархлар ўсиши ортидан оммавий намойишлар авж олди, норозилар ҳукумат ва олий раҳбар сиёсатини очиқ танқид қилмоқда.
Эронда иккинчи кун кетма-кет оммавий норозилик намойишлари давом этмоқда. Пойтахт Теҳрон ва қатор йирик шаҳарларда савдогарлар, кичик бизнес эгалари ҳамда фуқаролар кўчаларга чиқиб, йўлларни тўсмоқда ва Ислом Республикаси раҳбариятига қарши шиорлар айтишмоқда. Намойишларга асосий туртки — миллий валюта риёлнинг кескин қадрсизланиши ва кундалик товарлар нархининг тез ўсиши бўлди.
Оммавий ахборот воситаларига кўра, пойтахтда кўплаб дўконлар ёпилган, Теҳрон бозорининг бир қисми ва олтин савдоси вақтинча тўхтатилган. Айрим пайтларда доллар курси 1,42 млн риёлгача чиққан. Расмий маълумотларда йиллик инфляция 42 фоиздан ошгани, озиқ-овқат ва дори-дармон нархлари эса ўнлаб фоизга қимматлашгани қайд этилмоқда.
Хавфсизлик кучлари намойишларни тарқатиш учун кўздан ёш оқизувчи газ ва сув пуркагичлардан фойдаланмоқда. Расмийлар валюта инқирозини «психологик омиллар» билан изоҳлаб, акция иштирокчиларини жиноий жавобгарлик билан қўрқитмоқда. Бироқ шунга қарамасдан, намойишлар сиёсий тус олгани кузатилмоқда.
Тегеран, Ҳамадон, Аҳвоз, Кирмон, Милард, Кешм ороли каби ҳудудларда «Диктаторга ўлим», «Али Хоманаий — қотил», «Ғазо ҳам, Ливан ҳам эмас — ҳаётим Эрон учун» каби шиорлар янграгани хабар қилинмоқда. Айрим видеоларда норозилар Эрон ҳокимиятининг ҲАМАС ва «Ҳизбуллоҳ»ни қўллаб-қувватлашини танқид қилиб, ички иқтисодий муаммоларга эътибор қаратилсин, деган талабларни илгари сурмоқда.
Associated Press маълумотига кўра, Теҳрондаги акциялар 2022 йилдан бери энг йирик норозиликлардан бирига айланган. Шу фондда Эрон Марказий банки раҳбари Муҳаммад Ризо Фарзин истеъфога чиққан. У лавозимга келган 2022 йилда доллар курси тахминан 430 минг риёл бўлган эди. Декабрь ойида озиқ-овқат инфляцияси йиллик ҳисобда 70 фоизга етгани, ёқилғи нархлари оширилиши эса вазиятни янада оғирлаштириши мумкинлиги айтилмоқда.
