Эрондаги намойишларда қурбонлар сони бўйича кескин тафовут кузатилмоқда
«Reuters» эронлик мулозимга асосланиб 5 минг одам қурбон бўлганини, «The Sunday Times» эса шифокорларга асосланиб 16,5 минг одам ўлганини айтмоқда.
Эронда 2025 йил охири — 2026 йил бошида бўлиб ўтган оммавий норозилик намойишларида ҳалок бўлганлар сони юзасидан тарқатилаётган маълумотлар ўртасида катта фарқ кузатилмоқда. Ғарб оммавий ахборот воситаларига таянилса, қурбонлар сони бир неча мингдан ўн минглаб одамларгача етиши мумкин.
«The Sunday Times» нашри мамлакат ичида ишлаётган шифокорлар ҳисоботига таяниб, камида 16 500 нафар инсон ҳалок бўлганини ёзди. Газетага кўра, яраланганлар сони 330 минг нафаргача етган бўлиши мумкин. Манбаларнинг таъкидлашича, қурбонларнинг катта қисми энг кескин икки кунлик куч ишлатиш пайтига тўғри келган. Шифокорлар хавфсизлик кучлари томонидан ўқотар қурол қўллангани, жабрланганлар орасида ёшлар улуши жуда юқори эканини билдирган.
Шу билан бирга, Эрон раҳбарияти бундан анча кам рақамларни келтирмоқда. Олий раҳбар Оятуллох Али Хоманаий уч ҳафталик намойишлар давомида «бир неча минг» киши ҳалок бўлганини тан олган. Унинг сўзларига кўра, жавобгарлик намойиш иштирокчиларининг ўзларига юкланади, чунки улар гўё ташқи кучлар, хусусан АҚШ ва Исроил манфаатлари йўлида ҳаракат қилган.
«Reuters» агентлиги номаълум эронлик мансабдорга таяниб, ҳалок бўлганлар сони «камида 5 минг нафар» эканини хабар қилди. Манба воқеалар учун «террорчилар ва қуролланган исёнчилар»ни айблаган. Шунингдек, у ҳалок бўлганлар орасида тахминан 500 нафар хавфсизлик кучлари ходимлари борлигини айтган.
Мутахассислар фикрича, рақамлар орасидаги бундай тафовут ахборот шаффофлиги йўқлиги билан боғлиқ. Интернет узилишлари, мустақил журналистлар фаолиятига чекловлар ва расмий статистикага ишонч пастлиги воқеаларнинг ҳақиқий кўламини аниқлашни қийинлаштирмоқда.
Ҳозирча энг эҳтиёткор баҳолар ҳам Эрондаги намойишлар сўнгги ўн йилликлардаги энг қонли тўқнашувлардан бирига айланганини кўрсатмоқда.
