Фарғонада чиқинди ёқиш орқали электр энергияси олинади

Экология вазирлиги ҳузуридаги Чиқиндиларни бошқариш ва циркуляр иқтисодиётни ривожлантириш агентлиги директори ҳамда Хитойнинг етакчи экологик компанияси раҳбари ўртасида чиқиндиларни етказиб бериш битимлари имзоланган эди.

Унда чиқиндиларни термик қайта ишлаш орқали электр энергияси ишлаб чиқариш лойиҳаси Фарғона вилоятида босқичма-босқич татбиқ этилиши назарда тутилган. Мазкур лойиҳа Хитой Халқ Республикасининг «China Everbright International» LLC йирик компанияси томонидан амалга оширилади.

Агентлик хабарига кўра, ушбу завод Фарғона туманидаги Оқбилол қишлоғи яқинида жойлашган 8 гектар ҳудудда чиқинди ёқиш заводига тамал тоши қўйилиб, қурилиш жараёнларига старт берилди.

Фарғона вилоятида «China Everbright International» LLC компанияси томонидан умумий қиймати 141,5 млн АҚШ доллари миқдорида инвестиция жалб этилган. Кунига 1,5 минг тонна ёки йилига 547 минг тоннагача чиқинди қайта ишланиб, йилига жами 227,5 млн kWh электр энергияси ишлаб чиқарилади. Лойиҳа 150–200 та янги иш ўрни яратилиши билан ҳам аҳамиятлидир. Инвестор томонидан 2025–2027 йилларда лойиҳанинг ишга туширилиши таъминланади.

Электр энергиясини сотиб олиш ва қаттиқ маиший чиқиндиларни етказиб бериш тўғрисидаги битимларга мувофиқ лойиҳа компания ишлаб чиқарган электр энергиясини 30 йил давомида «Ўзэнергосотиш» АЖга кафолатланган тарзда сотади.

Маълумот учун, режа бўйича олтита вилоят, яъни Тошкент, Андижон, Наманган, Фарғона, Қашқадарё ва Самарқандда чиқиндиларни термик қайта ишлаш орқали электр энергияси ишлаб чиқариш мажмуаларини қуриш кўзда тутилган.

2025 йил июл ойида бир вақтнинг ўзида иккита чиқинди ёқиш заводининг қурилиши бошланганди. Лойиҳалардан бири Андижонда «China International Camce» билан ҳамкорликда, иккинчиси эса Самарқандда «Shanghai SUS Environment» иштирокида амалга оширилмоқда.

Эслатиб ўтамиз, аввалроқ Ўзбекистонда 42 та маиший чиқинди полигони фаолияти тугатилиб, 90 гектарга яқин ер майдони табиатга қайтарилгани ҳақида хабар бергандик.