«Ferrari» ўзининг илк электромобилини тақдим этди ва дизайн туфайли танқидга учради

Италиянинг ҳашаматли автомобиллар ишлаб чиқарувчи «Ferrari» компанияси ўзининг илк тўлиқ электрлаштирилган «Ferrari Luce» моделини тақдим этди, бироқ у интернет фойдаланувчилари томонидан кескин танқидларга учради.

«Apple» собиқ дизайнери Жоний Айв ва австралиялик саноат дизайнери Марк Нюсон томонидан лойиҳаланган ушбу электромобилнинг нархи 640 000 долларни ташкил этади.

Машинанинг тақдимот маросимида «Ferrari» жамоасининг Формула-1 пойгачилари Шарл Леклер ва Люис Хэмилтон иштирок этган. Янги модел тўртта электр двигатели билан жиҳозланган бўлиб, соатига 60 мил (тақрибан 96 км/соат) тезликка 2,5 сонияда эришади, унинг корпуси эса шиша билан қопланган.

Шунингдек, бу «Ferrari» тарихидаги илк 5 ўриндиқли автомобил ҳисобланади.

Интернетдаги танқидлар ва акцияларнинг тушиши

Ижтимоий тармоқларда автомобил дизайни кескин норозиликларга сабаб бўлди. «Х» фойдаланувчилари электромобилни анча арзон турадиган «Nissan Leaf» ва «Киа» моделларига ўхшатишган. «Tesla» мухлисларидан бири Сойер Мерритт янги моделни «тарихдаги энг хунук EV дизайнларидан бири» деб атаган. Бошқа фойдаланувчилар эса сунъий интеллект ёрдамида «Ferrari» учун ўзларининг янада замонавий ва паст профилли дизайн вариантларини яратиб кўрсатишган. Ушбу салбий муносабатлар фонида Миландаги сешанба кунги эрталабки савдоларда «Ferrari» акциялари 6 фоизга арзонлашди.

Дизайнер Марк Нюсон танқидларга жавоб берар экан, «танқидлар янгилик яратиш жараёнининг бир қисми» эканини таъкидлади ва одамлар келажакдан кўра кўпроқ ўтмишга интилиши дизайнерлар ишини қийинлаштираётганини айтди.

Шунингдек, «Ferrari Luce» бозорга глобал электромобиллар савдоси секинлашган ва йирик автогигантлар (Ford, GM, Honda) ўз EV режаларини қисқартираётган оғир даврда кириб келмоқда. Бироқ ушбу қадам компанияни Хитойнинг ҳашаматли электромобиллар бозорига кириб келаётган BYD (Denza ва Yangwang брендлари билан) каби рақобатчиларидан ҳимоя қилиши мумкин.