ФИФА жаҳон чемпионатидаги терма жамоалар сонини 64 тагача оширишни кўриб чиқмоқда
Жанни Инфантино эркаклар ўртасидаги футбол бўйича жаҳон чемпионати иштирокчилари сонини 64 та жамоагача ошириш масаласи кўриб чиқилишини маълум қилди.
ФИФА президенти Жанни Инфантино эркаклар ўртасидаги футбол бўйича жаҳон чемпионатида иштирок этувчи терма жамоалар сонини 64 тагача ошириш таклифи кўриб чиқилишини маълум қилди. Ҳозирда АҚШ, Канада ва Мексика мезбонлик қилаётган турнирда 48 та терма жамоа иштирок этмоқда.
«Бутун дунё учун» турнир
Инфантино бу ташаббусни жаҳон чемпионатини «бутун дунё учун» ташкил этиш истаги билан изоҳлади. У Швейцариянинг Blue Sport телеканалига берган интервьюсида иштирокчилар сонини 64 тагача ошириш ҳақидаги саволга жавобан:
«Буларнинг барчаси жаҳон чемпионатидан кейин кўриб чиқиладиган масалалар», — деди.
Унинг сўзларига кўра, жаҳон чемпионати фақат Европа ёки Жанубий Америка учун эмас, балки бутун дунё учун ташкил этилиши керак.
«Истисносиз барча мамлакатлар жаҳон чемпионатида иштирок этишни орзу қилиш имкониятига эга бўлиши лозим. Терма жамоалар савияси бутун дунё бўйлаб ошиб бормоқда. Агар кичик мамлакатларга жаҳон чемпионатларида қатнашиш имконияти берилмаса, уларда янада ривожланиш учун рағбат бўлмайди», — деди Инфантино.
ФИФА раҳбари 48 та терма жамоа иштирок этаётган биринчи жаҳон чемпионатини «улкан муваффақият» деб атади. Унинг таъкидлашича, Африкадан қатнашган 10 та терма жамоанинг 9 таси гуруҳ босқичидан чиққан. Аввалги жаҳон чемпионатида эса Африкадан атиги бешта терма жамоа плей-офф босқичига чиққан эди.
2017 йилда ФИФА Кенгаши жаҳон чемпионати иштирокчилари сонини 32 тадан 48 тага ошириш тўғрисида қарор қабул қилган.
2025 йил апрел ойида Жанубий Америка футбол конфедерацияси (КОНМЕБОЛ) 2030 йилги жаҳон чемпионатида иштирокчилар сонини 64 тагача ошириш таклифини расман илгари сурган.
2030 йилги жаҳон чемпионати асосан Испания, Португалия ва Марокашда ўтказилади.
Турнирнинг дастлабки уч учрашуви эса Аргентина, Уругвай ва Парагвайда бўлиб ўтади. Бу орқали илк жаҳон чемпионати ўтказилганининг 100 йиллиги нишонланади. Биринчи жаҳон чемпионати 1930 йилда Уругвайда бўлиб ўтган.
Таклифга нисбатан УЕФА президенти Александер Чеферин қарши чиқиб, буни ҳам турнир, ҳам саралаш босқичи учун «ёмон ғоя» деб атади.
Осиё футбол конфедерацияси (ОФК) президенти Шайх Салмон бин Иброҳим Ол Халифа ҳам иштирокчилар сонининг ошиши «тартибсизлик»ка олиб келиши мумкинлигини билдирди.
Шимолий ва Марказий Америка ҳамда Кариб ҳавзаси мамлакатлари футбол конфедерацияси (КОНКАКАФ) президенти Виктор Монталяни эса таклиф «тўғри эмас»лигини айтиб, иштирокчилар сонининг ортиши «бутун футбол экотизимига» салбий таъсир кўрсатишини таъкидлади.
Шу билан бирга, АҚШ Оқ уйининг жаҳон чемпионатини ташкил этиш бўйича ишчи гуруҳи ижрочи директори Эндрю Жулиани мамлакат 2038 йилги жаҳон чемпионатига мезбонлик қилиш учун номзодини қўйиши мумкинлигини ва 64 жамоали турнирни қабул қилиш имкониятига эга эканини билдирди.
ФИФАнинг расмий сиёсатига кўра, ташкилот Кенгаш аъзолари томонидан илгари сурилган барча кенгайтириш таклифларини кўриб чиқиши ва уларни манфаатдор томонлар билан муҳокама қилиши шарт. Якуний қарорни ФИФА Кенгаши қабул қилади. Ҳозирча бу масала яқин вақт ичида ҳал этилиши кутилмаяпти.
Инфантино 2016 йилда ФИФА президенти этиб сайланганида жаҳон чемпионати иштирокчилари сонини 32 тадан 40 тагача оширишни ваъда қилган эди. Бироқ орадан бир йил ўтмасдан иштирокчилар сони 48 тага етказилди ва бу формат 2026 йилги чемпионатдан жорий этилди.
2034 йилги жаҳон чемпионатига Саудия Арабистони мезбонлик қилади. Агар турнир 64 та терма жамоа иштирокида ўтказилса, мезбон мамлакат 128 та учрашувни қандай ташкил этиши ҳозирча номаълум.
