ФИФА ЖЧ-2026 олдидан ғайриоддий хизмат таклиф қилди
Футбол мухлислари 79 доллар эвазига ўз исмларини стадион таблосида кўришлари мумкин.
ФИФА 2026 йилги футбол бўйича Жаҳон чемпионати арафасида мухлислар учун янги тижорий хизматни ишга туширди.
Унга кўра, футбол ишқибозлари қўшимча ҳақ тўлаш орқали ўз исмларини турнир ўйинлари вақтида стадионнинг катта экранларида кўрсатиш имкониятини қўлга киритади.
«The New York Times» нашрининг маълум қилишича, мазкур хизмат нархи 79 долларни ташкил этади.
Мухлислар махсус ариза орқали ўз хабарларини юборишлари мумкин бўлиб, улар гуруҳ босқичи баҳслари олдидан ўтказиладиган чигалёзди машғулотлари вақтида аренанинг электрон таблосида намойиш қилинади.
ФИФА талабларига кўра, хабар матни 30 белгидан ошмаслиги керак. Шунингдек, хабарларда эможидан фойдаланишга рухсат берилмайди.
Янги хизмат турнирнинг гуруҳ босқичидаги барча 72 та учрашув учун амал қилади.
Таъкидланишича, ташаббус мухлисларнинг турнирга бўлган қизиқишини оширишга қаратилган.
2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Бу тарихда илк бор учта давлат ҳамкорликда мезбонлик қилаётган мундиал ҳисобланади.
Шунингдек, мусобақа кенгайтирилган форматда ўтказилиб, унда 48 та миллий терма жамоа иштирок этади.
Янги регламентга мувофиқ, ҳар бир гуруҳдан энг яхши икки жамоа ҳамда учинчи ўринни эгаллаган энг яхши саккиз терма жамоа плей-офф босқичига чиқади.
