Францияда Лувр музейини тунаган гуруҳнинг икки аъзоси қўлга олинди
Париж полицияси Луврдаги 88 млн евролик шоҳона зеб-зийнатлар ўғирланиши билан боғлиқ жиноят иши бўйича икки гумонланувчини ҳибсга олди. Улардан бири аэропортда Жазоирга қочмоқчи бўлган пайтда тутилган.
Франция полицияси Лувр музейида содир этилган жиноят — қироллик коллекциясидан қимматбаҳо зеб-зийнатлар ўғирланиши билан боғлиқ икки гумонланувчини қўлга олди.
Жиноят 19 октябр куни Париж марказида, музей иш бошлаган заҳоти амалга оширилган эди. Икки киши лифт-нарвон ёрдамида Аполлон галереясига кириб, қироллик коллекциясидаги витринани синдирган. Яна икки шериги эса қочиш учун тайёрланган скутерларда пастда кутган. Улар Франция тожи зеб-зийнатларидан умумий қиймати тахминан 88 млн евролик саккизта буюмни ўғирлаб кетган.
BFMTV телеканали манбаларига кўра, гумонланувчилардан бири 25 октябр куни кечқурун Руасси — Шарл-де-Голл аэропортида Жазоирга парвоз қилиш арафасида ҳибсга олинган. Ушбу операция чегара полицияси ва бандитизмга қарши кураш бригадаси томонидан амалга оширилган. Иккинчи гумонланувчи орадан бир неча дақиқа ўтиб Сен-Дени шаҳрида қўлга олинган, у Малига кетишни режалаштираётган бўлган.
JDD нашри ёзишича, ҳар икки гумонланувчи ҳам Сена-Сен-Дени департаменти аҳолиси бўлиб, илгари ҳам ўғирлик ва талончилик ишлари бўйича полицияда рўйхатда турган. Улар бир неча кун мобайнида кузатувда бўлган, чунки терговчига маълум бўлишича, ўғирланган зеб-зийнатлар четга олиб чиқилиши эҳтимоли бўлган. Тергов маълумотларига кўра, гумонланувчилар тажрибали ижрочилар бўлиб, буюртма асосида ишлаган бўлиши тахмин қилинмоқда.
Ҳозир полиция ҳужумда иштирок этган яна икки шахсни қидирмоқда. Похиш этилган қимматбаҳо буюмларнинг тақдири номаълум. Мутахассисларнинг фикрича, улар Франция ҳудудидан олиб чиқиб кетилган ёки алоҳида тошларга ажратиб сотилган бўлиши мумкин.
