Gunvor АҚШ босими ортидан «Лукойл» активларини сотиб олишдан воз кечди
Халқаро нефт трейдери Gunvor Group Россиянинг «Лукойл» компаниясига тегишли хорижий активларни сотиб олиш режасидан воз кечди. Бу қарор АҚШ Молия вазирлиги компанияни «Кремл қўғирчоғи» деб атаганидан сўнг қабул қилинди.
Кипрда рўйхатдан ўтган Gunvor 6 ноябр куни ўзининг расмий баёнотида «Лукойл»нинг хорижий бизнесини сотиб олиш бўйича таклифни қайтариб олганини маълум қилди. Бу хабар АҚШ Молия вазирлиги компанияга Украинадаги уруш тугамагунча лицензия бермаслигини билдирганидан бир соат ўтиб тарқалди.
АҚШ Молия вазирлиги ўз баёнотида «Президент Трамп уруш дарҳол тўхтатилиши кераклигини айтди. Путин қотилликларни давом эттирар экан, «Кремл қўғирчоғи» Gunvor ҳеч қачон лицензия олмайди», — деган.
Gunvor бу айбловларни «асоссиз ва дезинформация» деб атаган. Компаниянинг таъкидлашича, у ўн йилдан ортиқ вақтдан бери Россия билан алоқаларни узган, санкцияларга мувофиқ савдони тўхтатган ва Россиядаги барча активларини сотган. Шунингдек, Gunvor Украинадаги урушни омма олдида қоралаб келганини ҳам эслатди.
«Биз нотўғри тушунчани тузатиш имкониятидан мамнунмиз ва «Лукойл» активларини сотиб олиш бўйича таклифни расман қайтариб оламиз», — дейилади компания баёнотида.
Эслатиб ўтамиз, «Лукойл» АҚШ ва Буюк Британия санкциялари остида бўлиб, 30 октабр куни Gunvor билан хорижий бизнесни сотиш бўйича келишув эълон қилган эди. Россия томони бошқа харидорлар билан музокара қилмаслик мажбуриятини ҳам олган. Бироқ эҳтимолий битим санкцияларни айланиб ўтиш уриниши сифатида баҳоланиб, ғарб давлатларида шубҳа уйғотган.
Gunvor Group 2000 йилда россиялик бизнесмен Геннадий Тимченко ва швед ҳамкори Торберн Торнквист томонидан ташкил этилган. Компания ҳозирда дунёдаги энг йирик энергия трейдерларидан бири ҳисобланади. Тимченко 2014 йилда санкциялар таҳдиди сабаб ўз улушининг 44 фоизини шеригига сотган эди.
«Лукойл»нинг асосий акциядори Вагит Алекперов бўлиб, унинг бойлиги Forbes маълумотларига кўра, 28,7 миллиард долларга тенг. У 2022 йилда Британия санкцияларидан сўнг компания президенти лавозимини тарк этган.
Маълумот учун, 22 октaбр куни АҚШ Молия вазирлигининг Ташқи активлар назорати бошқармаси (ОФАC) Россияга нисбатан янги чекловлар жорий этган эди. Чекловлар «Лукойл», «Роснефт» ва уларнинг 34 та шуъба компанияларини ҳам қамраб олган. Бир ҳафта олдин Буюк Британия ҳам шу йўналишдаги санкцияларни кучайтирган эди.
