Ҳарбий сафарбарлик даврида кредит тўловлари кечиктирилиши мумкин

Қонунчилик палатасининг 13 май куни бўлиб ўтган мажлисида «Сафарбарлик тайёргарлиги ва сафарбарлик тўғрисида»ги қонун лойиҳаси биринчи ўқишда қабул қилинди.

Ҳужжат орқали мамлакатда сафарбарлик соҳасида ягона ҳуқуқий асос яратиш кўзда тутилмоқда.

Лойиҳада сафарбарлик тайёргарлиги ва сафарбарликнинг асосий мақсадлари, принциплари ҳамда устувор йўналишлари белгиланган. Шунингдек, давлат органлари, ташкилотлар ва фуқароларнинг ўзини ўзи бошқариш органларининг ваколатлари ва мажбуриятлари аниқлаштирилмоқда.

Ҳужжатда «сафарбарлик тайёргарлиги» ва «сафарбарлик» тушунчалари илк бор комплекс ҳуқуқий мазмунда ифодаланмоқда. Шу билан бирга, умумий ёки қисман сафарбарликни эълон қилиш механизмлари, давлат органлари вазифалари ва иқтисодиёт тармоқларини уруш шароитида ишлашга ўтказиш тартиби ҳам белгиланган.

Лойиҳада озиқ-овқат, ёқилғи, тиббий хизмат, транспорт ва алоқа каби муҳим тизимларнинг барқарор ишлашини таъминлаш чоралари ҳам назарда тутилган. Сафарбарлик даврида чақирилган фуқаролар учун иш жойини сақлаш, кредит тўловларини кечиктириш ва етказилган зарарларни қоплаш бўйича кафолатлар мустаҳкамланмоқда.

Мажлисда депутатлар мазкур қонун мамлакат мудофаа салоҳиятини ошириш, Қуролли Кучларнинг жанговар шайлигини кучайтириш ва Ўзбекистоннинг суверенитети ҳамда ҳудудий яхлитлигини таъминлашда муҳим аҳамиятга эга эканини таъкидлади.

Шу куни «Ҳарбий хизматчилар мақоми ва уларни ижтимоий ҳимоя қилиш тўғрисида»ги қонун лойиҳаси ҳам биринчи ўқишда қабул қилинди. Унда ҳарбий хизматчиларнинг ҳуқуқлари, имтиёзлари ва ижтимоий кафолатларини комплекс тартибга солиш кўзда тутилган.