Ҳўрмуз очилгандан сўнг нефт нархи кескин тушди
Эрондаги уруш оқибатида жаҳон бозорида нефт нархи кўп йиллик энг юқори кўрсаткичларга кўтарилган эди.
Жаҳон нефт бозорида кескин ўзгариш қайд этилди. «Brent» нефти нархи бир баррел учун 89–90 долларгача тушди.
«Yahoo Finance» маълумотларига кўра, Тошкент вақти билан 17:56 да нарх 89,55 доллар атрофида шаклланган бўлиб, бу бир кун аввалги кўрсаткичдан қарийб 10 фоизга камдир.
Нархнинг пасайиши Эрон Ташқи ишлар вазири Аббос Арагчи томонидан Эрон Ҳўрмуз бўғозини барча тижорат кемалари учун қайта очиқ деб эълон қилганидан кейин бошланди.
Бу қарор бозорда таъминот барқарорлашишига оид кутилмаларни кучайтирди.
Юқори нархлардан пасайиш
Аввалроқ, АҚШ ва Исроил билан можаро авж олган пайтда нефт нархи кескин ошган эди. Хусусан, 9 март куни «Brent» нефти бир баррел учун қарийб 120 долларгача етган.
Ҳўрмуз бўғози орқали дунё нефт таъминотининг тахминан 20 фоизи ўтади. Шу сабабли, унинг ёпилиши бозорда жиддий танқисликка олиб келган ва кунлик тахминан 15 миллион баррел нефт таъминоти узилган эди.
