Ҳуқуқни муҳофаза қилиш академиясида келгуси йилдан «Киберҳуқуқ» йўналиши очилади
Президентнинг тегишли фармони билан прокуратура соҳасини рақамлаштириш жараёни такомиллаштрилади.
Президентнинг тегишли фармонига кўра, Ҳуқуқни муҳофаза қилиш академиясида 2026/2027 ўқув йилидан ҳар йилги қабул параметрлари (квоталари) доирасида кундузги таълим шаклида ўқиш муддати 4 йилни ташкил этадиган «Киберҳуқуқ» бакалавриат таълим йўналиши жорий этилади.
Бундан ташқари, «E-tergov» ахборот тизими жорий этилиб, унинг асосий вазифалари этиб қуйидагилар белгиланди:
жиноят иши юритувининг барча босқичларини электрон шаклга ўтказиш;
суд экспертизасини онлайн режимда тайинлаш;
моддий зарарни ҳисобга олиш ва ундириш жараёнларини мониторинг қилиш.
Ушбу фармон ҳамда Стратегиядаги вазифаларнинг амалга оширилишини таъминлаш учун Бош прокуратуранинг Ахборот-коммуникация технологияларини жорий этиш ва ахборот хавфсизлигини таъминлаш бошқармаси негизида Бош прокуратуранинг Рақамли технологиялар маркази ташкил этилади.
Аввалроқ «Raqamli prokuror» ахборот тизимлари комплекси жорий қилиниши ҳақида хабар берилганди.
