ИИВ журналистлар нега ИИБга олиб кетилганини айтди
Ички ишлар вазирлиги матбуот котиби Шоҳруҳ Ғиёсовга кўра, воқеа жойида жанжал келиб чиққан.
Аввалроқ, Тaftish.uz интернет нашри журналистлари ва видео оператори фуқаролар мурожаатини ўрганишга борганда ИИО ФМБга олиб кетилгани ҳақида хабар берган эдик. Ички ишлар вазирлиги матбуот котиби Шоҳруҳ Ғиёсов ҳолат юзасидан расмий муносабат билдирди.
Унга кўра, бугун, 23 октябр куни Тошкент шаҳри Юнусобод тумани прокуратураси томонидан ўтказилаётган сайёр қабул жараёнида интернет нашри вакиллари ва сайёр қабулга келган бошқа фуқаролар ўртасида жанжал келиб чиққан.
Ҳолат юзасидан фуқаролар томонидан 102 қисқа рақамига тушган мурожаат бўйича воқеа жойига етиб борган ИИО ходимлари вазиятга аниқлик киритиш мақсадида, жанжал иштирокчиларининг барчасини ИИБга олиб келиб, суҳбат ўтказган.
Қайд этилишича, ҳозирда ҳолат юзасидан ўрганиш олиб борилмоқда.
Ғиёсовнинг таъкидлашича, ички ишлар органлари ходимларининг ҳаракатлари жамиятда икки субъект ўртасида келиб чиққан низоли вазиятга нисбатан ҳуқуқни муҳофаза қилувчи органлар томонидан амалга ошириладиган ҳуқуқий жараён ҳисобланиб, ОАВларининг қонуний фаолиятига тўсқинлик каби важларга умуман алоқаси йўқ.
«Taftish.uz канали маъмурларидан «журналистларга суиқасд», «зўравонлик ишлатилган», «асоссиз равишда олиб кетилган», «техникасининг бир қисми синдирилган» каби жамоатчиликни чалғитувчи маълумотларни тарқатмасликларини сўраймиз», - деган Ғиёсов.
