Икки ойда 45 та уюшган жиноий гуруҳ фош этилди

Ўзбекистонда жорий йилнинг январ–феврал ойларида 45 та уюшган жиноий гуруҳ фош этилди. Бу ҳақда Ички ишлар вазирлиги матбуот хизмати маълум қилди. Қайд этилишича, мамлакатда жиноятчиликка қарши курашиш бўйича қатор кенг қамровли тезкор тадбирлар амалга оширилган.

Тезкор тадбирлар

Маълумотларга кўра, Ички ишлар вазирлиги, Давлат хавфсизлик хизмати, Бош прокуратура ҳамда бошқа ҳуқуқни муҳофаза қилувчи идоралар ҳамкорлигида жами 6025 та махсус тезкор тадбир ўтказилган. Уларнинг 806 таси тунги рейдлардан, 2876 таси эса тинтув тадбирларидан иборат бўлган.

Олиб борилган текширувлар натижасида жиноятчилик билан боғлиқ кўплаб ҳолатлар аниқланган. Хусусан, 116 та товламачилик, 315 та қурол-яроғни ноқонуний сақлаш, 86 та қиморхона ташкил этиш, 40 та одам савдоси ҳолати фош этилган. Шунингдек, 790 та фоҳишахона сақлаш ва ОИВ инфекциясини тарқатиш билан боғлиқ ҳолатлар ҳам аниқланган.

Қидирувдаги шахслар

Қидирувда бўлган 533 нафар шахс қўлга олингани қайд этилди. Бу ишлар жиноятчиликка қарши курашиш ва жамоат хавфсизлигини таъминлашга қаратилган комплекс чора-тадбирлар доирасида амалга оширилган.

Қурол билан боғлиқ 315 та иш юзасидан катта миқдордаги ашёвий далиллар мусодара қилинган. Жумладан, 4570 та совуқ қурол, улар орасида 50 та бита, 72 та кастет ва 4004 та ўткир тигли буюмлар бор. Шунингдек, 5814 та ўқ-дори ва 3,7 килограмм портловчи моддалар олиб қўйилган.

Бундан ташқари, ижтимоий тармоқларда жиноий ғоялар ва бузғунчи мазмундаги материалларни тарқатган 47 та аккаунт блоклангани маълум қилинди. Ички ишлар вазирлиги бу каби ҳолатларга қарши курашиш чоралари изчил давом эттирилишини билдирди.