Илҳом Алиев Зангезур коридори қурилиши деярли якунланганини айтди
Тошкентда ўтган саммитда Илҳом Алиев Зангезур лойиҳаси бўйича Вашингтон келишувини ҳам эслаб ўтди. Коридор ташқи транзит имкониятларини кенгайтиради.
Озарбойжон президенти Илҳом Алиев Тошкентда бўлиб ўтган Марказий Осиё давлатлари раҳбарларининг VII Маслаҳатлашув учрашувида Зангезур коридори қурилиши якунланаётганини эълон қилди.
Бу ҳақда «Азертаж» агентлиги хабар берди.
«Жорий йил август ойида Вашингтонда эришилган келишувлар орқали Озарбойжоннинг асосий қисми Нахичивон автоном республикаси билан боғланади. Бу халқаро юк ташишлар учун транзит имкониятларини кенгайтиришга хизмат қилади», — деди Алиев.
Зангезур коридори — Озарбойжонни унинг эксклави бўлмиш Нахичивон билан боғлашни мақсад қилган транспорт йўлагидир. Бу йўл Арманистон жанубида жойлашган Сюник вилояти орқали ўтиши режалаштирилган. Лойиҳага кўра, коридорнинг узунлиги тахминан 40 кмни ташкил этади.
Транспорт ва логистика соҳаси бўйича озарбойжонлик мутахассис Рауф Агомирзаев Зангезур коридорини техник жиҳатдан 2028 йил охиригача ишга тушириш мумкинлигини билдирган.
Бироқ лойиҳа сиёсий муаммолардан холи эмас. Жумладан, Эрон Олий раҳнамоси оятуллоҳ Оли Хоминаийнинг маслаҳатчиси Али Акбар Вилоятий август ойидаги баёнотида Арманистон орқали Зангезур коридори ташкил этилишига кескин қарши эканини айтган. Унга кўра, бундай коридор минтақанинг геосиёсий мувозанатини ўзгартириши, чегараларни қайта тақсимлаши ва Арманистоннинг парчаланишига олиб келиши мумкин.
