Илон Маск OpenAI ва Microsoft'дан 134 млрд доллар талаб қилмоқда

Илон Маск OpenAI ва Microsoft'дан жами 134 миллиард долларгача товон пули талаб қилмоқда. Бу ҳақда жума куни федерал судга киритилган даъво аризасида айтилди. Маскнинг таъкидлашича, у OpenAI ташкил этилган дастлабки йилларда компанияга катта молиявий ва ташкилий ҳисса қўшган, шунинг учун кейинчалик олинган фойданинг маълум қисми унга тегишли.

Ҳужжатга кўра, Маск 2015 йилда стартап сифатида ташкил этилган OpenAI’нинг илк ривожланишида ҳал қилувчи рол ўйнаган. У тахминан 38 миллион доллар киритган бўлиб, бу компаниянинг дастлабки уруғ сармоясининг 60 фоизини ташкил этган. Шунингдек, у жамоа шаклланиши, инвесторлар ва алоқаларни жалб этиш ҳамда лойиҳа обрўсини оширишга ҳисса қўшганини таъкидламоқда.

Маскнинг ҳисоб-китобларига кўра, унинг иштирокисиз OpenAI ҳозирги қийматига етмаган бўлар эди. Даъво аризасида OpenAI Маск ҳиссаси орқали 65,5 миллиарддан 109,4 миллиард долларгача, Microsoft эса 13,3 миллиарддан 25,1 миллиард долларгача иқтисодий фойда олгани қайд этилган.

OpenAI бу талабни «асоссиз» ва «тазйиқ компаниясининг бир қисми» деб атади. Компания фикрича, Маск 2018 йилда OpenAI’ни тарк этганидан сўнг рақобатчи лойиҳалар билан шуғулланиб келмоқда ва даъволар реал асосга эга эмас. Microsoft эса иш юзасидан изоҳ беришдан тийилди.

Шу билан бирга, OpenAI ва Microsoft суддан Маск томонидан жалб қилинган молиявий эксперт хулосаларини чеклашни сўрамоқда. Улар бу ҳисоб-китобларни текшириб бўлмайдиган ва ҳаётий эмас, деб баҳоламоқда. Суд жараёни апрел ойида бошланиши кутилмоқда.