Илон Маск танқид остида: Уни «X» алгоритмларини қўлда ўзгартираётганликда айблашди

Ethereum ҳаммуаллифи Виталик Бутерин «X» (собиқ «Twitter») платформасини бошқаришда Илoн Маскнинг сиёсатини кескин танқид қилди. Унинг фикрича, тармоқ алгоритмлари сунъий равишда ўзгартирилиб, нафратни кучайтирувчи сиёсий контентни илгари суришга хизмат қилмоқда. Бутерин айни пайтда «X» «сўз эркинлиги тумори» эмас, балки «нафрат сочишга хизмат қилувчи ўлим юлдузи»га айланганини таъкидлади.

Бутерининг баёноти Европа Иттифоқига қарши кескин танқидлар ва ҳужумлар тўлқинидан кейин пайдо бўлди. Унинг айтишича, тармоқда тарқалаётган салбий риторика конструктив баҳс эмас, балки Европа имижини туширишга қаратилган кампаниявозликка ўхшайди. Бутерин Европа бюрократияси ва GDPR каби муаммоларни тан олган ҳолда, платформаларда тарқалаётган «Европани варварлар босмоқда» каби хабарларни мутлақо бўрттирилган, реал ҳаётга зид деб атади.

^{Виталик Бутерин}

Муаммонинг моҳияти, Бутерининг таъкидлашича, Маск томонидан алгоритмларга бевосита аралашувда. У Маск айрим мавзуларни сунъий равишда трендга айлантираётгани, бошқаларини эса чеклаётганини айтди. Бу эса миллионлаб тўловчи фойдаланувчиларнинг ахборот майдони бир одамнинг қарорларига боғлиқ бўлиб қолди, дегани.

Крипто ҳамжамиятида катта таъсирга эга Бутерининг бу баёноти марказлашган платформаларга бўлган ишончнинг пасайишини янада кучайтирди. Унинг фикрича, бир шахс тасарруфидаги глобал ижтимоий тармоқлар сўз эркинлигининг кафолати бўла олмайди ва бу ҳолат техник элитанинг марказсизлаштирилган ижтимоий тармоқларга — Bluesky каби платформаларга ўтишига тезлаштириши мумкин.

Аввалроқ Еврокомиссиянинг «Х» платформасига 120 млн евролик жаримасидан сўнг Илон Маск Евроиттифоқни «тугатиш» ва суверенитетни миллий ҳукуматларга қайтариш кераклигини айтиб, бюрократия «Европани ўлдирмоқда», дея танқид қилгани ҳақида хабар берган эдик.