Илон Маскнинг ҳақиқий бойлиги қанча экани эълон қилинди

«Forbes Real-Time Billionaires» маълумотларига кўра, 15 июн куни Илон Маскнинг бойлиги 1,3 триллион долларга етди. Бу «Forbes» кузатувлари тарихида қайд этилган энг юқори кўрсаткич ҳисобланади.

Бойликнинг кескин ўсишига «SpaceX» компаниясининг IPO жараёни сабаб бўлди. Компания акциялари дастлабки савдоларда 19 фоиздан ортиқ қимматлашган бўлса, 15 июн куни яна 19,5 фоизга ўсди. Натижада компаниянинг бозор қиймати 3 триллион доллардан ошиб кетди.

Бир кунда 165 миллиард доллар

Акцияларнинг ўсиши ортидан Маскнинг шахсий бойлиги бир куннинг ўзида тахминан 165 миллиард долларга кўпайди.

У «SpaceX»нинг 4,8 миллиард дона акциясига, шунингдек, ҳар бирини 8,40 доллардан сотиб олиш ҳуқуқини берувчи 350 миллионта акция опционига эгалик қилади.

Бу улушлар Маскка компаниянинг тахминан 38 фоизини назорат қилиш имконини беради.

16 июн ҳолатига кўра, «Forbes» унинг бойлигини 1,29 триллион доллар деб баҳоламоқда.

Рақобатчилар анча ортда қолмоқда

Таққослаш учун: «Forbes» рейтингида иккинчи ўринни эгаллаб турган «Google» ҳаммуассиси Ларри Пейжнинг бойлиги 301,4 миллиард долларга тенг бўлса, «Amazon» асосчиси Жефф Безоснинг бойлиги 255,5 миллиард долларни ташкил этади.

Шу тариқа, Маск ўзининг энг яқин таъқибчисини қарийб 1 триллион долларга ортда қолдирмоқда.

Тарихдаги энг йирик IPO

12 июн куни «SpaceX» NASDAQ биржасида акцияларини оммавий савдога чиқариб, 85,7 миллиард доллар маблағ жалб қилди. Бу тарихдаги энг йирик IPO сифатида қайд этилди.

Савдоларнинг биринчи кунидаёқ акциялар 19 фоизга қимматлашди. Айнан шу куни Маскнинг бойлиги 1 триллион доллардан ошиб, у тарихда расман триллионер мақомини қўлга киритган биринчи инсонга айланди.