iPhone 17 Apple’ни 4 трлн доллар капитализацияга олиб чиқди
Apple капитализацияси тарихий 4 трлн долларлик чегарани босиб ўтди. Бу натижа iPhone 17 моделига бўлган юқори талаб билан изоҳланмоқда. Компания энди iPhone 19 дан воз кечиб, 2027 йилдаги юбилей сабаб iPhone 20’ни чиқаришга тайёрланмоқда.
Apple корпорацияси бозордаги навбатдаги рекордини янгилади — компания капитализацияси 4 трлн долларга етди, деб хабар бермоқда Bloomberg. Бу кўрсаткич билан Apple Nvidia ва Microsoftдан кейин мазкур даражага чиққан дунёдаги учинчи компания бўлди.
Савдо сессиясида Apple акциялари 0,4 фоизга қадар кўтарилди, аммо NASDAQ биржаси ёпилиш пайтида 268,59 долларга тушди. Шу билан бирга, компаниянинг умумий қиймати 3,99 трлн долларни ташкил этди. Bloomberg таҳлилчилари бундай ўсишни сентябр ойида сотувга чиқарилган iPhone 17 моделининг кутилмаган даражадаги оммавий талаб билан изоҳлашмоқда.
Apple акциялари апрел ойида қайд этилган энг паст нуқтасидан буён 56 фоизга ўсган — бу компания қийматини тахминан 1,4 трлн долларга оширди. TradingView маълумотларига кўра, дунёдаги энг катта компаниялар қиймати бўйича қуйидагича тақсимланган: Nvidia — 4,7 трлн доллар, Microsoft — 4,6 трлн доллар, Apple — 3,99 трлн доллар, Alphabet — 3,24 трлн доллар ва Amazon — 2,42 трлн доллар.
Шу билан бирга, Apple 2027 йилда iPhone 19 моделини чиқармасликни, балки юбилей муносабати билан iPhone 20 номли янги авлодни тақдим этишни режалаштирмоқда. Бу ҳақда ETNews ва TRT HABER Omdia тадқиқот марказининг бош таҳлилчиси Ҳео Му-йолнинг маълумотларига таяниб хабар берди.
Apple юбилей йилида бир нечта янги қурилмаларни тақдим этишни кўзламоқда: 2027 йилнинг биринчи ярмида арзонроқ iPhone 18e модели, иккинчи ярмида эса iPhone 20 серияси, иккинчи авлод букланувчи iPhone ҳамда янги iPhone Air моделлари сотувга чиқиши кутилмоқда.
Мутахассислар фикрича, компаниянинг юбилей стратегияси бозордаги рақобатни кучайтиради ва Apple’нинг премиум сегментдаги етакчилигини мустаҳкамлайди.
