Ипотека кредитларини молиялаштиришнинг янги усулидан фойдаланиш бошланди
Ўзбекистонда илк бор ипотека кредитларини секюритизация қилиш тартиби жорий этилди. Бу механизм банк тизими ликвидлигини ошириб, аҳоли учун уй-жой кредитларини кенгайтиришга хизмат қилади.
Ўзбекистонда ипотека кредитларини секюритизация қилишнинг вақтинчалик тартиби тасдиқланди. Бу ҳақда Истиқболли лойиҳалар миллий агентлиги хабар берди. Ушбу қарорга кўра, мамлакатда ипотека кредитларини молия бозорига интеграция қилишнинг янги механизми йўлга қўйилади.
«Секюритизация— бу банк томонидан берилган кредитларни жамлаб, уларни облигация кўринишида капитал бозори орқали инвесторларга таклиф этиш жараёнидир. Бу усул банкларга янги маблағларни жалб қилиш, кредитлаш фаолиятини кенгайтириш ва ликвидликни ошириш имконини беради.»
Тартибга мувофиқ, «Ўзбекистон ипотекани қайта молиялаштириш компанияси» акциядорлик жамияти ҳузурида махсус ваколатли ташкилот тузилади. Ушбу ташкилот республиканинг бешта тижорат банки томонидан берилган ипотека кредитларини секюритизация қилиб, 1 трлн сўмлик ипотека облигацияларини синов тариқасида чиқаради.
Молия вазирлиги маълумотича, ипотека облигацияларини жорий этиш мамлакат капитал бозори учун янги босқич бўлади. Бу орқали банк тизимидаги молиявий хатарлар қайта тақсимланиб, аҳолига уй-жой кредити бериш имкониятлари кенгаяди.
Жаҳон тажрибасига кўра, 2024 йилда уй-жой ипотека облигациялари бозори ҳажми 920 миллиард долларга етган. Шунинг 653 миллиард доллари АҚШ, 129 миллиард доллари Австралия, 74 миллиард доллари Буюк Британия ва 64 миллиард доллари Европага тўғри келган.
Эслатиб ўтамиз, 2025 йилнинг январь–август ойларида Ўзбекистон аҳолисига 15,1 трлн сўм ипотека кредити ажратилган.
