Ироқ ва курд расмийлари экспорт бўйича келишувга эришгач, нефт нархлари пасайди

Бугун, 18-март куни нефт нархлари пасайди ва кечаги кескин ўсишнинг бир қисмини йўқотди. Бунга Ироқ ҳукумати ва курд расмийлари Туркиянинг Жейҳан порти орқали нефт экспортини қайта тиклаш бўйича келишувга эришгани сабаб бўлди. Бу Яқин Шарқдаги таъминот бўйича хавотирларни бироз юмшатди, деб хабар берди «Reuters».

Бироқ, Эрон билан боғлиқ можарода пасайиш аломатлари кузатилмаяпти ва бу Яқин Шарқдан нефт экспортининг катта қисми тўхтаб қолишига олиб келган. Шу сабабли «Brent» фючерслари сўнгги тўрт савдо сессияси давомида баррели 100 доллардан юқори даражада сақланиб турди.

Кеча, 17-март куни 3 фоиздан ортиқ ўсгандан кейин, бугун, 18-март куни 02:09 ҳолатига кўра «Brent» нархи 67 центга (0,65 фоиз) пасайиб, баррели 102.75 долларни ташкил этди. АҚШнинг «West Texas Intermediate» нефти эса 1.18 доллар (1,23 фоиз)га тушиб, 95.03 долларга етди.

Ироқ нефт вазири Ҳайан Абдулғани давлат ОАВ орқали маълум қилишича, Жейҳан орқали нефт оқими бугун, 18-март куни бошланиши кутилмоқда. Икки амалдор ўтган ҳафта Ироқ порт орқали кунига камида 100 минг баррел нефт чиқаришни режалаштираётганини билдирган.

«Бу, албатта, маълум даражада ёрдам беради ва вақт юттиради, аммо кунига 100 минг баррел катта ўзгариш яратмайди, чунки Ироқ ҳали ҳам тахминан кунига икки миллион баррел нефт йўқотган», – деди «IG» бозор таҳлилчиси Тони Сисамор.

Ироқнинг асосий жанубий нефт конларида, мамлакат нефтининг катта қисми ишлаб чиқариладиган ва экспорт қилинадиган ҳудудларда, ишлаб чиқариш кескин пасайиб, кунига атиги 1,3 миллион баррелга тушиб қолди. Манбаларнинг 8-мартда билдиришича, бунга Эрон билан боғлиқ можаро сабаб бўлиб, дунё нефтининг тахминан 20 фоизи ўтадиган Ҳўрмуз бўғози де-факто ёпилиб қолган.

Уруш давом этмоқда

Эрон 17-март куни унинг хавфсизлик бўйича юқори мартабали расмийси Али Ларижони Исроил ҳужумида ҳалок бўлганини тасдиқлади. У АҚШ–Исроил уруши бошланганидан бери нишонга олинган энг юқори лавозимли шахс ҳисобланади.

Юқори лавозимли эронлик амалдорнинг айтишича, Эроннинг янги олий раҳбари воситачи давлатлар орқали етказилган деэскалация таклифларини рад этган.

АҚШ ҳарбийлари 17-март куни Ҳўрмуз бўғози яқинидаги Эрон соҳил ҳудудларида жойлашган объектларга зарба берганини маълум қилди, чунки Эроннинг кемаларга қарши ракеталари халқаро денгиз ташувларига хавф туғдираётгани айтилди.

«Али Ларижонининг ўлими ва АҚШнинг Ҳўрмуз бўғози яқинидаги Эрон позицияларига берган зарбалари можаро тезроқ тугаши мумкинлигига айрим умидларни кучайтирди», – деди «China Futures» компаниясининг энергетика ва кимё соҳаси бўйича бош тадқиқотчиси Мингю Гао.

АҚШда нефт захиралари 13-мартда тугаган ҳафтада 6,56 миллион баррелга ошган, дея бозор манбалари «American Petroleum Institute» (API) маълумотларига таяниб хабар қилди. АҚШ нефт захиралари 13-мартгача бўлган ҳафтада тахминан 380 минг баррелга ошган бўлиши кутилган.