Исроил Эроннинг «амалдаги раҳбари» Али Лорижоний йўқ қилинганини иддао қилди

Исроил Мудофаа вазири Йисраэл Кацнинг баёнотига кўра, марҳум оятуллоҳ Али Хоманаийга энг яқин шахслардан бири бўлган Али Лорижоний Теҳрондаги махсус амалиёт нишонига айланган.

«The Times of Israel» нашрининг ёзишича, ЦАҲАЛ (Исроил мудофаа армияси) Лорижонийни Эроннинг «амалдаги раҳбари» деб атаган. У мамлакат ядро дастурининг асосий фигураси бўлишдан ташқари, Ислом инқилоби муҳофизлари корпусида (ИИМК) юқори лавозимларни эгаллаган ва узоқ йиллар парламентга раҳбарлик қилган.

Шунингдек, Исроил ҳарбийлари Эрон ичидаги норозилик намойишларини шафқатсизларча бостириш билан шуғулланувчи «Басиж» кўнгиллилар қўшини қўмондони Ғуломризо Сулаймоний ҳам ўлдирилганини тасдиқлади. Исроил мудофаа вазири Кацнинг таъкидлашича, бу зарбалар режимнинг хавфсизлик ва бошқарув тизимини бутунлай фалаж қилишга қаратилган.

«Биз режим раҳбариятини ов қилишда давом этамиз ва саккизоёқнинг бошини қайта-қайта чопиб ташлаб, унинг ўсишига йўл қўймаймиз», деди вазир.

Расмий Теҳроннинг инкори

Ҳозирча Теҳрон расмийлари Лорижонийнинг ўлимини тасдиқлагани йўқ. Эроннинг «Fars» давлат агентлиги Лорижоний томонидан ўз қўли билан ёзилгани айтилаётган хатни эълон қилди. 17-март санаси билан имзоланган ушбу мактубда у Эрон ҳарбий-денгиз кучлари хизматчиларининг ҳалок бўлгани муносабати билан ҳамдардлик билдирган. Бироқ кузатувчилар бу хатнинг ҳақиқийлигига ва Эрон раҳбариятининг вазиятни назорат қилаётгани ҳақидаги даъволарига шубҳа билан қарамоқда.

Аввалроқ Кувайт нашрлари янги раҳбар Мўжтабо Хоманаий жароҳат олиб, Москвага эвакуация қилингани ҳақида хабар берган эди. Али Лорижоний эса Мўжтабонинг номидан эълон қилинаётган мурожаатларнинг асл муаллифи ва мамлакатни панадан туриб бошқараётган шахс сифатида кўрилаётган эди. Унинг йўқ қилиниши, агар тасдиқланса, Эрон давлатчилик тизими учун сўнгги ўн йилликдаги энг оғир йўқотиш бўлади.

Эрон олий элитасидаги йўқотишлар

28-февралда АҚШ ва Исроилнинг Эронга қарши ҳарбий амалиёти бошланганидан бери Теҳроннинг деярли барча олий ҳарбий-сиёсий раҳбарияти йўқ қилингани даъво қилинмоқда. Олий раҳбар Али Хоманаий урушнинг биринчи кунидаёқ ҳукумат комплексига ташланган 30 та бомба натижасида ҳалок бўлган эди. Ўша ҳужумда унинг оила аъзолари, маслаҳатчиси Али Шамҳоний ва ИИМК қўмондони Муҳаммад Покпур ҳам қурбон бўлган.

Айни пайтда Эрон бошқарув тизимида чуқур инқироз кузатилмоқда. Раҳбариятнинг катта қисми жисмоний йўқ қилингани ёки оғир жароҳат олгани Теҳроннинг ташқи тажовузга ва Ҳўрмуз бўғозидаги вазиятга таъсир ўтказиш имкониятларини чеклаб қўйди. Исроил ва АҚШнинг «стратегик бошсизлантириш» амалиёти ўз самарасини бермоқда, бироқ Эроннинг қолдиқ кучлари ва прокси гуруҳлари ҳали ҳам хавф туғдиришда давом этмоқда.