Исроил Хоминаининг жойлашувини кўча камералари орқали аниқлаган
Исроил хакерлари шаҳар видеокузатув тизимини бузиб кириб, Эрон олий раҳбарияти ҳайдовчиларининг барча ҳаракатланиш йўналишларини ўрганиб чиққан.
Йиллар давомида олиб борилган кузатув
Исроил йиллар давомида Теҳрон шаҳрини кузатиб келган ва олий раҳнамо Али Хоминаига зарба беришга тайёргарлик кўриш учун шаҳар видеокузатув тизимидан фойдаланган. Бу ҳақда операциядан хабардор манбаларга таяниб, «Financial Times» нашри хабар бермоқда.
Нашр маълумотларига кўра, Исроил разведкаси Эрон пойтахтидаги деярли барча йўл камераларини бузиб кирган. Улар камера ёзувларини шифрлаб, Исроилдаги серверларга узатиб турган. Таҳлилчилар юқори мартабали амалдорларнинг тансоқчилари ва ҳайдовчиларининг йўналишларини кузатиб, уларнинг иш жадвали, автотураргоҳлари ва яшаш манзилларини қайд этиб борган. Шу тариқа махсус хизматлар ҳар бир гуруҳ айнан кимни қўриқлашини ва олий раҳнамонинг ўзи қайси вақтларда уларнинг ёнида бўлишини аниқлаган.
Алоқа тизимлари ҳам издан чиқарилган
FT манбаларининг таъкидлашича, камералар кенг кўламли кампаниянинг бир қисми бўлган, холос. Зарбадан олдин Исроил мутахассислари Хоминаининг қароргоҳи жойлашган Пастер кўчаси яқинидаги ўндан ортиқ мобил алоқа миноралари ишини издан чиқарган. Қўриқчиларнинг телефонлари тармоқ бандлигини кўрсатиб, қўнғироқларни қабул қилмаган. Бу эса қўриқлаш гуруҳини ўз ҳаракатларини тезда мувофиқлаштириш имкониятидан маҳрум қилган.
Исроил разведкасининг амалдаги ходимларидан бири нашрга «ҳужумдан анча олдин биз Теҳронни Қуддусни билганимиздек билардик», деган.
Унинг сўзларига кўра, маълумотларни узоқ вақт давомида тўплаш одатий кун тартибидаги ҳар қандай ўзгаришларни пайқаш имконини берган.
28 феврал: Якуний қарор ва зарба оқибатлари
28 феврал куни АҚШ ва Исроил Эронга қарши ҳарбий операция бошлади. Зарбалар Теҳрон ва бошқа йирик шаҳарларга берилди. Ҳужум оқибатида Хоминаи ва Эрон раҳбариятининг бир қатор асосий вакиллари ҳалок бўлди. АҚШ президенти Доналд Трампнинг таъкидлашича, дастлабки икки кун ичидаги зарбалар оқибатида Эроннинг 48 дан ортиқ етакчиси ўлдирилган. Теҳрон бу маълумотни қисман тасдиқлаган.
FT манбалари Хоминаини ўлдириш қарори Вашингтонда эмас, балки Тел-Авивда — сиёсий даражада қабул қилинганини таъкидламоқда. Разведка фақат 28 феврал тонгида унинг учрашуви бўлиб ўтадиган вақт ва жой ҳақидаги аниқ маълумотларни тақдим этган. Нашр билан суҳбатлашган манбаларнинг фикрича, аллақачон бошланган уруш шароитида бундай имконият бошқа туғилмаслиги мумкин эди.
Хоминаи бункерлардан фойдаланмаган
Шу билан бирга, газета Эрон олий раҳнамоси бункерлардан фойдаланмагани ва «ўлдирилишдан қўрқмагани»ни алоҳида қайд этган. FT маълумотларига кўра, Хоминаи сўнгги йилларда Исроилнинг эҳтимолий ҳужумига тайёргарлик кўрган, шунинг учун бункерларларда яширинишдан бош тортиб, йиғилишларни очиқ жойларда ўтказиб келган.
