Жанубий Кореяда терроризмни молиялаштиришган ўзбекистонлик эркак қўлга олинди
У «хайрия жамғармаси» ниқоби остида террорчи гуруҳларга криптовалюта орқали пул ўтказган.
Жанубий Корея полицияси 29 ёшли Ўзбекистон фуқаросини терроризмни молиялаштиришда гумонлаб ҳибсга олди. Бу ҳақда The Chosun Daily нашри хабар берди.
У 16 октябрь куни Ансеонг шаҳридаги ётоқхонада қўлга олинган. Ҳибсга олиш жараёнлари Корея Миллий разведка хизмати ва АҚШ Федерал қидирув бюроси (ФБИ) ҳамкорлигида амалга оширилган.
Тергов маълумотларига кўра, ўзбекистонлик эркак «Терроризмга қарши кураш тўғрисида»ги ва «Террорчилик маблағларини тақиқлаш тўғрисида»ги қонунларни бузганликда гумонланмоқда.
Маълумотларга кўра, у саккизта ижтимоий тармоқда, жумладан Instagram орқали «Аллоҳ йўлида жиҳод, муқаддас урушни биргаликда олиб борайлик» каби кўплаб экстремистик ғояларини тарғиб қилган.
У ижтимоий тармоқлар орқали Африкада қудуқ қазиш лойиҳаларига эътибор қаратувчи хайрия ташкилотини қўллаб-қувватлаш баҳонасида тахминан 620 минг USDT (952 млн вон) тўплаган. Пулнинг бир қисми БМТ томонидан террорчи деб тан олинган «Ҳамас» ва «Катиба тавҳид вал-жиҳод» гуруҳларига ўтказилгани аниқланган.
Полиция маълумотига кўра, «Ҳамас»га ўтказилган маблағнинг аниқ миқдорини билиб бўлмайди ва у бундан ҳам кўп маблағ юборган бўлиши мумкин. Бундан ташқари, у хайрия маблағларини жалб қилиш учун ички ва халқаро банк ҳисоблари ҳамда кредит карта тўловлари ҳаволаларини улашган.
Шунингдек, у Геонгги минтақасида ўз ватандошларини жалб қилиш учун футбол клуби ташкил этган ва у орқали ҳам маблағ йиққан. Бу маблағларнинг миқдори аниқланмаган. Ҳозирда полиция унинг бошқа шериклари ва қўшимча маблағ манбаларини ўрганмоқда.
Маълумотларга кўра, у 2018 йилда талабалик визаси билан Кореяга кирган, аммо ўқишни ташлаб кетган. 2023 йилдан буён у қочқин мақомини сўраб 11 марта ариза берган, аммо барчаси рад этилган.
Эркак аввал ҳам Ўзбекистонда террорчилик маблағларини молиялаштиришда айбланиб, маҳаллий қидирувда бўлган. Ўзбекистон элчихонаси унинг паспортини бекор қилиб, Корея полициясидан уни ҳибсга олишни сўраган.Ўзбекистон элчихонаси унинг паспортини бекор қилиб, Корея полициясидан ҳибсга олишни сўраган.
