ЖЧ-2026 чипта эгалари учун АҚШ визаси суҳбатлари тезлаштирилади
АҚШ Жаҳон чемпионати чиптасига эга бўлган мухлисларга 6–8 ҳафта ичида имтиёзли суҳбат тайинлаш тизимини жорий этди.
АҚШ президенти Доналд Трамп 2026 йилги Жаҳон чемпионати ўйинларига чипта сотиб олган мухлислар учун виза суҳбатлари тезлаштирилишини маълум қилди.
Унинг сўзларига кўра, янги тартиб мусобақага ташриф буюришни режалаштирган минглаб мухлислар учун катта енгиллик яратади.
Трампнинг таъкидлашича, чипта эгалари имтиёзли тартибда суҳбат муддатини олдинга суриш имконига эга бўлади. Улар аризани топширганидан кейин тахминан олти ёки саккиз ҳафта ичида суҳбатга чақирилиши мумкин бўлади. Президент мухлисларни протсесстан эртароқ ўтиш учун аризаларни кечиктирмасдан юборишга чақирди.
Бироқ АҚШ давлат котиби Марко Рубио чипта визани автоматик равишда таъминламаслигини алоҳида урғу билан қайд этди.
«Сизнинг чиптангиз виза эмас; у АҚШга киришни кафолатламайди», — деди Рубио.
Унга кўра, чипта фақат суҳбатга тезроқ тайинланиш ҳуқуқини беради, холос. Аризачилар бошқалар каби тўлиқ хавфсизлик текширувидан ўтишда давом этади. Рубионинг айтишича, ягона фарқ — номзодлар навбатда олдинга сурилади.
Давлат департаменти аризалар оқимини енгиллаштириш мақсадида дунё бўйлаб 400 дан зиёд қўшимча консуллик ходимларини юборган. Айрим мамлакатларда, хусусан, Бразилия ва Аргентинада аввал виза суҳбатига тайинланиш бир йилдан ортиқ вақтни олган бўлса, янги тартиб орқали бу муддат икки ойдан камроқ вақтга тушиши мумкин.
Шу билан бирга, виза тақиқланган давлатлар чипталари эгаларига ушбу устуворлик татбиқ этилиши аниқ айтилмаган. 2025 йилнинг июнь ойида Трамп 12 давлат фуқароларининг АҚШга киришини чекловчи фармонни имзолаган эди. Улар орасида Жаҳон чемпионатига чиққан Эрон ҳам бор. Фармонга кўра, спортчилар ва мураббийлар таркибига истисно берилади, бироқ оддий мухлислар учун чеклов кучда қолиши мумкин.
ФИФА маълумотларига кўра, ЖЧ-2026 чипталарини АҚШда яшамайдиган қарийб бир миллион киши сотиб олишга улгурган. ФИФА Президенти Жанни Инфантино АҚШга мусобақа давомида 5 миллиондан 10 миллионгача мухлис ташриф буюриши мумкинлигини айтди. Чемпионат 2026 йил июнида АҚШ, Мексика ва Канадада старт олади ва илк маротаба 48 та жамоанинг иштирокини ўз ичига олади.
Трамп Жаҳон чемпионатини мамлакат учун «бир умрда бир марта бўладиган имконият» деб атаган. Унинг сўзларига кўра, мусобақа АҚШ иқтисодиёти учун улкан фойда келтириб, 30 миллиард доллардан ортиқ даромад олиб келиши мумкин.
