ЖЧ-2026: Фаворитлар рўйхати ва Ўзбекистоннинг «қора от» бўлиш имконияти

Бу йилги Жаҳон чемпионатида рекорд даражадаги 48 та жамоа иштирок этади. Мусобақанинг биринчи (гуруҳ) босқичи эса 12 та гуруҳга бўлинган.

Ўн иккита сараланган жамоа (шу жумладан, учта мезбон давлат ва рейтинги энг юқори бўлган саккизта мамлакат) гуруҳлар бўйлаб тақсимланган. ФИФА рейтингида энг юқори поғонани эгаллаб турган тўртта жамоа — Испания, Аргентина, Франция ва Англия — теннис турнирларидаги каби плей-офф сеткасининг турли бўлимларига жойлаштирилди.

ФИФАнинг маълум қилишича, ушбу тўртта энг кучли давлат ўз гуруҳларида биринчи ўринни эгалласа, то ярим финалга қадар ўзаро тўқнаш келмайди.

Ҳар бир гуруҳдан энг яхши натижа қайд этган иккита жамоа автоматик равишда 1/16 финалга (32 та жамоа қатнашадиган плей-офф босқичига) йўл олади. Уларга энг яхши кўрсаткичга эга бўлган 8 та учинчи ўрин соҳиблари ҳам қўшилади.

«Al Jazeera» нашри томонидан гуруҳлар энг мураккабидан энг осонига қараб рейтингга жойлаштирилди ва ҳар бир квартетдан кейинги босқичга чиқиш имконияти юқори бўлган иккита фаворит танланди.

I гуруҳи: Франция, Сенегал, Ироқ, Норвегия

Бу йилги Жаҳон чемпионатидаги «ўлим гуруҳи» мақомига айнан I гуруҳи даъвогарлик қилмоқда. Чунки бу ердан жой олган тўртта жамоа ФИФА рейтинги бўйича энг юқори ўртача кўрсаткичга эга.

Франция чемпионлик унвонини қўлга киритиш учун асосий фаворитлардан бири ҳисобланади. Сенегал эса Африканинг энг кучли вакилларидан биридир.

Эрлинг Холанд етакчилигидаги Норвегия терма жамоаси кутилмаган ва сенсацион натижа кўрсатиши мумкин бўлган жамоа ҳисобланса, йўлланмани қўлга киритиш учун саралашда энг кўп ўйин ўтказган Ироқ ҳам осонликча таслим бўлмаслиги аниқ.

• Автоматик равишда кейинги босқичга чиқиш учун фаворитлар: Франция ва Сенегал.

F гуруҳи: Нидерландия, Япония, Швеция, Тунис

Дунё бўйича ўртача рейтинги 26-ўринни ташкил қилувчи (шу жумладан, 7-ўринда бораётган Нидерландия) ушбу гуруҳ ҳам анча мураккаб.

Япония мусобақага йўлланма олган биринчи давлат бўлди ва яқиндагина «Уэмбли» стадионида Англияни мағлуб этди. Швеция эса Александр Исак ва Виктор Гёкереш каби кучли ҳужумчилари билан мақтана олади.

Тунис саралаш босқичидан бирорта ҳам гол ўтказиб юбормасдан муваффақиятли ўтди ва ўз тарихида илк бор плей-офф босқичига чиқишга ҳаракат қилади.

• Автоматик равишда кейинги босқичга чиқиш учун фаворитлар: Нидерландия ва Япония.

L гуруҳи: Англия, Хорватия, Гана, Панама

Хорватия сўнгги икки Жаҳон чемпионатида финал ва ярим финалгача етиб борди. Жамоа бу сафар ҳам турнирда имкон қадар узоқроққа боришни мақсад қилган.

Улар очилиш ўйинидаёқ Англияга қарши майдонга тушади. Таъкидлаш жоизки, бу мусобақа Томас Тухел бошқарувидаги дастлабки йирик турнир бўлади.

Карлуш Кейруш Гана терма жамоасини гуруҳ босқичидан олиб чиқиш учун ўзининг бор тажрибасини ишга солади. Панама эса мусобақага Марказий Американинг энг юқори рейтингга эга жамоаси сифатида ташриф буюрмоқда.

Мантиқан олиб қараганда, Англия ва Хорватия ушбу гуруҳдан қийинчиликсиз чиқиши керак, аммо бу улар учун унчалик ҳам осон кечмаслиги аниқ.

• Автоматик равишда кейинги босқичга чиқиш учун фаворитлар: Англия ва Хорватия.

C гуруҳи: Бразилия, Марокаш, Гаити, Шотландия

ФИФА рейтингида кучли ўнталикка кирувчи иккита жамоа жой олган мазкур гуруҳда рақобат анча кучли бўлиши кутилмоқда.

Гарчи Бразилия аввалгидек енгилмас кучга эга бўлмаса-да, Карло Анчелотти шогирдлари барибир гуруҳда биринчи ўринни эгаллаш учун асосий фаворит сифатида эътироф этилмоқда.

Африка Миллатлар кубоги ғолиби Марокаш эса 2022 йилги қаҳрамонлигини такрорлашга уринади ва айнан улар Бразилиянинг энг жиддий рақибига айланиши кутилмоқда.

Шотландия ва Гаити катта эҳтимол билан учинчи ўрин учун кураш олиб боради. Бироқ улар юқори рейтингдаги икки номдор жамоага кутилмаган «совға» тақдим этиши ҳам ҳеч гап эмас.

• ·      Автоматик равишда кейинги босқичга чиқиш учун фаворитлар: Бразилия ва Марокаш.

K гуруҳи: Португалия, Конго Демократик Республикаси, Ўзбекистон, Колумбия

Португалия ва Колумбия мазкур гуруҳнинг яққол фаворитларидек кўринмоқда, аммо қитъалараро плей-офф ғолиби Конго Демократик Республикаси ёки мусобақа дебютанти бўлмиш Ўзбекистонни ҳам ҳисобдан чиқариб юбориб бўлмайди.

Марказий Осиё вакилларини илк Жаҳон чемпионатига Фабио Каннаваро бошлаб тушади. Қолаверса, жамоа сафида «Манчестер Сити» ҳимоячиси Абдуқодир Ҳусанов ҳам борлигини унутмаслик лозим.

Колумбия 2024 йилда, яъни сўнгги 20 йилдан ортиқ вақт ичида илк бор Америка кубоги финалига қадар етиб борди ва энди биринчи ўрин учун Криштиану Роналду етакчилигидаги Португалия термаси билан жиддий кураш олиб боради.

• ·         Автоматик равишда кейинги босқичга чиқиш учун фаворитлар: Португалия ва Колумбия.

H гуруҳи: Испания, Кабо-Верде, Саудия Арабистони, Уругвай

Кўпчилик мутахассислар бу турнирда Испанияни яққол фаворит деб ҳисобламоқда. «Қизил фурия» (La Roja) «Евро-2024» мусобақасидаги муваффақиятли юришини Мундиалда ҳам яна бир йирик соврин билан давом эттиришга интилади.

Уларнинг Марсело Биелса бошқарувидаги Уругвайга қарши баҳси гуруҳ босқичининг энг эътиборга молик ўйинларидан бири бўлиши кутилмоқда ва айнан шу икки жамоа катта эҳтимол билан биринчи ўрин учун кураш олиб боради.

Саудия Арабистони «Қатар-2022» мусобақасида кутилмаган сенсацион натижалар қайд эта олишини барчага кўрсатиб қўйган эди. Улар катта эҳтимол билан гуруҳдаги учинчи ўрин учун Кабо-Верде билан курашади.

• ·         Автоматик равишда кейинги босқичга чиқиш учун фаворитлар: Испания ва Уругвай.

E гуруҳи: Германия, Курасао, Кот-д'Ивуар, Эквадор

Ушбу гуруҳдаги ўртача ФИФА рейтинги барча квартетлар ичида пастлиги бўйича иккинчи ўринда турса-да, барибир анчагина мураккаб жамоалар тўқнашувига ўхшамоқда.

Германия секин-аста ўзининг оптимал спорт формасига қайтмоқда ва Жаҳон чемпионатларида кетма-кет икки бор гуруҳ босқичидан чиқа олмаганидан сўнг, бу сафар плей-оффга йўл олишга қаттиқ интилади.

Жанубий Америка саралаш босқичида Аргентинадан сўнг иккинчи ўринни эгаллаган Эквадор ўзини кучли томондан кўрсатишга ҳаракат қилади. Жамоа сафида «Челси» ярим ҳимоячиси Мойсес Кайседо борлигини ҳам унутмаслик керак.

Кот-д'Ивуар яқиндагина Африка Миллатлар кубогида муваффақиятли қатнашди ва ўртоқлик учрашувида Францияни мағлуб этди. Мусобақа дебютанти Курасао эса кўпчилик учун ҳали-ҳамон жумбоқлигича қолмоқда.

• ·         Автоматик равишда кейинги босқичга чиқиш учун фаворитлар: Германия ва Эквадор.

J гуруҳи: Аргентина, Жазоир, Австрия, Иордания

Бу йил Аргентинага қуръа жараёнида омад кулиб боқди. Амалдаги жаҳон чемпионлари катта эҳтимол билан гуруҳ ғолиби сифатида қийинчиликсиз кейинги босқичга чиқишади.

Австрия ва Жазоир ФИФА рейтингида бир-бирига жуда яқин жойлашган. Шу боис уларнинг ўзаро ўйини гуруҳдаги иккинчи йўлланма тақдирини ҳал қилиши кутилмоқда.

Иордания гарчи мусобақа дебютанти бўлса-да, ҳеч кимга осонликча таслим бўлмайди. Улар 2023 йилги Осиё кубоги финалчиси ҳисобланади, қолаверса, саралаш босқичида 32 та гол уриб, сафар ўйинларида бирор марта ҳам мағлубиятга учрамаган.

·         Автоматик равишда кейинги босқичга чиқиш учун фаворитлар: Аргентина ва Австрия.

A гуруҳи: Мексика, Жанубий Африка, Жанубий Корея, Чехия

ФИФА рейтингидаги ўртача 35-ўрин кўрсаткичи билан мазкур квартет мусобақадаги энг осон гуруҳлардан биридек таассурот уйғотмоқда.

Турнир мезбонларидан бири бўлган Мексика ўз майдони устунлигига таянади ва кучли иккиликдан жой олиш учун жуда яхши имкониятга эга деб қараляпти.

Жанубий Корея Осиё минтақаси саралаш босқичида мағлубиятга учрамаган ягона жамоа бўлди. Улар 74 ёшли мутахассис Мирослав Коубек бошчилигидаги Чехия билан иккинчи ўрин учун жиддий кураш олиб бориши кутилмоқда.

Жанубий Африка ўз тарихида ҳеч қачон Жаҳон чемпионатининг плей-офф босқичига чиқа олмаган. Аммо бу сафар уларда энг яхши кўрсаткичга эга учинчи ўрин соҳиблари қаторида 1/16 финалга йўл олиш имконияти мавжуд.

• ·         Автоматик равишда кейинги босқичга чиқиш учун фаворитлар: Мексика ва Жанубий Корея.

G гуруҳи: Белгия, Миср, Эрон, Янги Зеландия

Гарчи белгияликларнинг «олтин авлод» даври ортда қолган бўлса-да, мазкур гуруҳ улар учун анча қулай танловдек кўринмоқда. Белгиянинг гуруҳдаги рақибларидан ҳеч бири шу пайтгача Жаҳон чемпионатида гуруҳдан чиқа олмаган. Шу боис Руди Гарсия бошқарувидаги жамоа биринчи ўринни эгаллаши мумкин.

Муҳаммад Салоҳ етакчилигидаги Миср ҳалигача Жаҳон чемпионатларида бирорта ҳам ғалаба қозона олмаган, бироқ улар Эрон ва Янги Зеландияга қарши ўйинларда ўз имкониятларини юқори баҳолашмоқда.

Мамлакатда кечаётган сиёсий ва ҳарбий вазият сабабли Эроннинг тайёргарлик жараёни тартибсиз ўтди ва бу уларнинг майдондаги ўйинига қандай таъсир қилишини башорат қилиш қийин. Мусобақадаги энг паст рейтингга эга жамоа саналган Янги Зеландияни эса олдинда жуда оғир кураш кутиб турибди.

• ·         Автоматик равишда кейинги босқичга чиқиш учун фаворитлар: Белгия ва Миср.

D гуруҳи: АҚШ, Парагвай, Туркия, Австралия

Гарчи ушбу гуруҳдаги жамоаларнинг ўртача ФИФА рейтинги мусобақадаги иккинчи энг юқори кўрсаткичга эга бўлса-да, амалда бу мезбон давлат учун энг омадли ва «осон» гуруҳлардан бири ҳисобланади.

АҚШ жаҳон рейтингида 16-ўринда бормоқда ва гуруҳдаги энг юқори поғонани эгаллаб турибди. Бош мураббий Маурисио Почеттино гуруҳдан муваффақиятли чиқишда Кристиан Пулишичнинг индивидуал маҳоратига таянади.

Гарчи бу гуруҳда яққол ажралиб турадиган суперюлдузли жамоа бўлмаса-да, рақобат жуда кучли бўлиши кутилмоқда. Плей-офф орқали йўлланмани қўлга киритган Туркия термаси АҚШ билан биргаликда кучли иккиликдан жой олиш учун энг асосий даъвогар бўлиб турибди.

Парагвай ва Австралия гуруҳдаги энг паст рейтингли жамоалар ҳисобланади, аммо ҳар иккиси ҳам кейинги босқичга чиқиш имкониятларини етарли даражада юқори баҳолайди.

• ·         Автоматик равишда кейинги босқичга чиқиш учун фаворитлар: АҚШ ва Туркия.

B гуруҳи: Канада, Босния ва Герцеговина, Қатар, Швейцария

Бу гуруҳ ФИФА рейтингидаги ўртача 42-ўрин кўрсаткичи билан мусобақадаги энг «паст» кўрсаткичли гуруҳ ҳисобланади. Аммо, худди D гуруҳида бўлгани каби, маҳорат борасидаги камчилик ўрнини кучли рақобат ва шиддатли ўйинлар тўлдириши кутилмоқда.

Швейцария энг юқори рейтингга эга жамоа ҳисобланади ва улар йирик мусобақаларнинг плей-офф босқичига чиқиш борасида катта тажрибага эга.

Мезбонлардан бири бўлган Канада аввалги чемпионатларда катта натижаларга эриша олмаган. Лекин бу сафар мураббий Жесси Марш қўл остида, ўз уйида ва мухлислари қаршисида яхшироқ ўйин кўрсатишга ҳаракат қилиши табиий.

Босния ва Герцеговина саралаш плей-оффида Италияни мусобақадан чиқариб юборганини инобатга олсак, улар гуруҳдан чиқишни жиддий мақсад қилган кўринади. 2023 йилги Осиё кубоги чемпиони Қатар ҳам сенсацион натижа қайд этиши мумкин.

• ·         Автоматик равишда кейинги босқичга чиқиш учун фаворитлар: Швейцария ва Канада.