Жиззахда 12 млрд долларлик йирик инвестиция лойиҳалари амалга оширилади
Ушбу лойиҳалар амалга оширилгач, вилоят саноат, қишлоқ хўжалиги ва туризм соҳалари бўйича янада ривожланган ҳудудга айланиши кутилмоқда.
Президент иштирокидаги Халқ депутатлари Жиззах вилояти Кенгашининг навбатдан ташқари сессиясида вилоятда ҳар бир туманнинг ихтисослашувидан келиб чиқиб, инвесторларга аниқ лойиҳалар пакетини таклиф қиладиган муҳит шакллангани қайд этилди.
Маълум қилинишича, Жиззах вилоятидаги улкан салоҳият ҳисобига ҳозирнинг ўзида 12 миллиард долларлик 152 та йирик инвестиция лойиҳаси портфели тайёр экани эълон қилинди.
Мазкур лойиҳалар амалга оширилса, вилоят саноат, қишлоқ хўжалиги ва туризм соҳасида янада ривожланган ва жозибадор ҳудудга айланади. Хусусан, вилоятнинг тоғли, сувли ва яйлов ҳудудлари боғдорчилик ҳамда туризм бўйича, дашт ва чўл ери кўп туманлар эса саноат бўйича янгича ёндашувлар асосида ривожлантирилади.
Шунингдек, саноат зоналаридаги 3 та дирекция негизида инвесторларни кутиб олиш, уларга ҳамроҳлик қилиш, маркетинг билан шуғулланадиган Ягона бошқарув компанияси ташкил қилинади.
Ушбу компанияга саноат зоналарида жойлашадиган лойиҳаларга ернинг бозор қийматида улушдор бўлиб кириш ваколати берилади.
