Карлсон: Америка етакчилари Нетаняҳунинг талабларини бажариш ўрнига, қатъий позицияни эгаллашлари лозим

Америкалик журналист Такер Карлсон АҚШнинг ички муаммолари фонида Исроилга кўрсатилаётган ҳаддан ташқари катта эътиборни танқид қилди. У бу ҳақда Исроилга ташрифидан сўнг Саудиянинг «Rotana Khalijiyya» телеканалига берган интервюсида тўхталиб ўтди.

Исроил — АҚШ учун «юк»

«Исроил АҚШ учун жуда катта юк. Аслида, бу бизнинг чегараларимиздан ташқарида дуч келаётган энг жиддий юкдир», — деди журналист.

Карлсон икки давлат ўртасидаги муносабатлар АҚШга зарар келтираётганини қайд этди. Шу билан бирга, у Исроил ҳукуматини айбламаслигини, чунки у ўз мамлакати манфаатларидан келиб чиқиб ҳаракат қилаётганини таъкидлади.

«(Исроил бош вазири Бинямин) Нетаняҳу ўз мамлакатига барча имкониятлар билан ёрдам беришга ҳаракат қилмоқда ва бу йўлда АҚШдан фойдаланяпти», — деди у.

Эрон масаласида босим

Журналист Америка етакчилари нима учун бундай вазиятга йўл қўйиб бераётганини тушунмаслигини қўшимча қилди.

«Ҳозирги вақтда АҚШдаги кўплаб Исроил тарафдорлари Эронда режимни ўзгартириш учун Америка ресурсларини урушга сафарбар қилиш мақсадида улкан босим ўтказмоқда. Исроил номидан Эрон ҳукуматини ағдариш — янги Эронни барпо этиш эмас, балки шунчаки ҳокимиятдагиларни четлаштириш ва яхшироқ келажакдан умид қилиб тартибсизликлар келтириб чиқариш — қандай қилиб АҚШ манфаатларига мос келиши мумкин?», — дея савол қўйди Карлсон.

Унинг сўзларига кўра, бундай ёндашув на АҚШ ва на минтақа давлатлари манфаатларига хизмат қилади. Унинг фикрича, бу ҳатто Исроилнинг узоқ муддатли манфаатларига ҳам зиддир.

Вашингтонга чақириқ

Карлсон АҚШ иқтисодиёт, миллий бирлик ва миграция масалаларида жиддий муаммоларга дуч келаётганини таъкидлади. Унинг фикрича, Америка етакчилари Нетаняхунинг талабларини бажариш ўрнига, қатъий позицияни эгаллашлари лозим.

«Агар Эрон ҳукуматини портлатишни истасангиз — омад тилайман. Бу бизнинг ишимиз эмас», — деди у.

Бундан ташқари, журналист айрим америкалик сиёсатчиларнинг ўз мамлакатидан кўра Исроилга кўпроқ садоқат кўрсатаётганини айтиб, буни хиёнат деб атади. Карлсон сенаторлар Тед Круз ва Линдси Грэмни танқид қилиб, уларни Исроил манфаатларини ўз сайловчилари манфаатларидан устун қўйишда айблади.