Кайя Каллас: Евроиттифоқ Россияга қарши санкцияларнинг 20-пакети устида иш бошлади

Европа Иттифоқи Россияга қарши санкцияларнинг навбатдаги, 20-пакети устида иш бошлади. Бу ҳақда жума куни, 14 ноябрда, ЕИнинг ташқи ишлар ва хавфсизлик сиёсати бўйича юқори вакили Кайя Каллас Берлинда Германия мудофаа вазири Борис Писториус ва бошқа ҳамкасблари билан учрашувдан сўнг маълум қилди, деб ёзади DW.

Санкциялар ҳақида нималар маълум?

«Урушда кимнинг пули ёки аскарлари аввал тугаса, ўша ютқазади», — деди Каллас. Унинг сўзларига кўра, шу сабабли «Россияга нисбатан санкциявий босимни давом эттиришимиз керак».

Каллас АҚШ томонидан Россия нефт компанияларига қарши киритилган сўнгги чеклов чораларини юқори баҳолади.

«Санкциялар фақат халқаро ҳамкорлар томонидан қўллаб-қувватланган тақдирдагина самарали ишлайди», — деди у. Калласнинг бу сўзларини dpa агентлиги келтирмоқда.

Шу билан бирга, у 20-пакет мазмуни бўйича ҳеч қандай қўшимча маълумот бермади.

Янги чекловлар нималарга тааллуқли бўлади?

Брюсселдаги дипломатларга кўра, санкциялар Россиянинг айрим энергетика компаниялари ва «хуфиёна флот» деб аталувчи нефт танкерларига тааллуқли бўлиши мумкин.

Москва ушбу флотдан Ғарб давлатлари жорий қилган нефт нархини чеклаш сиёсатига қарши чиқиш мақсадида фойдаланмоқда. Оддий ҳолларда, бу схемада эскирган кемалар ишлатилади ва нефт юкларининг келиб чиқишини яшириш учун турли усуллар қўлланилади.

ЕИ санкцияларининг 19-пакети

Европа Иттифоқи санкцияларнинг аввалги — 19-пакетини октябр ойида кучга киритган эди. Бу чоралар, хусусан, Россиянинг газ ва нефт сотишдан келадиган даромадларини янада қисқартиришга қаратилган.

Россиядан суюлтирилган газ импорт қилишга тўлиқ тақиқ 2027 йилдан кучга киради — бу режа дастлаб режалаштирилган муддатдан бир йил илгарироқ амалга оширилади.

Шунингдек, санкциялар молиявий соҳани қамраб олади ва Европа Иттифоқи ҳудудида россиялик дипломатларнинг ҳаракатланиш эркинлигини чеклаш чораларини ҳам ўз ичига олади.