Кэмерон янги «Терминатор» учун сценарий ёзаётганини айтди
Жеймс Кэмерон 40 йил аввал яратган «Терминатор» франшизасига қайтмоқда, аммо технологиялар шиддати туфайли илғор фантастика ёзиш тобора қийинлашаётганини тан олди.
Дунё киносида илғор фантастиканинг символига айланган Жеймс Кэмерон янги «Терминатор» фильми учун сценарий ёзаётганини маълум қилди. Режиссёрнинг айтишича, ғоялар кўп, лекин муаммо — технологиялар суръати фантастикадан ҳам тез ривожланмоқда. У бу ҳақда Gizmodo нашрига берган интервюсида сўзлаган.
Кэмероннинг айтишича, у сценарий учун «ёзувлар тўплами»ни тайёрлаб улгурган, аммо иш секин кетмоқда.
«Илмий-фантастика бизга етди ва ҳатто бизни лол қолдирмоқда. Биз илгари фақат китоб ва филмларда учрайдиган муаммоларни энди ҳаётда кўряпмиз», — деди у.
Режиссёр 1984 йилги ўз муваффақиятини такрорлаш бугун имконсизга яқин эканини тан олди. У вақтда у СИнинг қудрати ва инсонга таҳдидини экранга илк олиб чиққан эди. «Ҳеч ким бир-икки йилдан кейин нима бўлишини билмайди. Мен камида бироз олдинга қараб, ўзимни хатарлардан ҳимоя қилмоқчиман», — деди Кэмерон.
Режиссёр ҳозирда «Аватар: Ўт ва кул » фильмининг маркетинг кампанияси билан банд бўлиб, шу иш тугагач, янги «Терминатор» сценарийига тўлиқ киришишини айтди.
У СИ ҳақида ўз хавотирларини ҳам яширмади. «Генератив СИ актёр ярата олади, ўйин ярата олади. Бу мени қўрқитади. Бу — айнан биз қилмаслигимиз керак бўлган нарса», — деди Кэмерон.
Унинг фикрича, СИ ўз-ўзидан ҳақиқий янгилик ярата олмайди: «Моделлар фақат илгари яратилган асарларга таянади. Уларда инсоннинг бетакрор тажрибаси, сценарийчининг ўзига хослиги ёки актёрнинг индивидуаллиги бўлмайди», деган у.
Шу билан Кэмерон бир тарафдан янги қисмга қизиқиш уйғотса, бошқа тарафдан технологиялар инсон ижодига бўлган таъсири ҳақида жиддий саволлар қўйди.
