Кибержиноятчилар 2 трлн сўмдан ортиқ пулни талон-торож қилган — ИИВ

Ўзбекистонда кибержиноятчилар томонидан фуқароларнинг 2 триллион сўмдан ортиқ маблағи талон-торож қилинган. Бу ҳақда Ички ишлар вазирлиги Кибержиноятчиликка қарши кураш департаменти бошлиғи Мирзохон Зубайдуллаев 13 июн куни Сенат мажлисида маълум қилди.

Масъулнинг сўзларига кўра, 2021 йилдан буён кибержиноятлар турлари 18 тадан 64 тагача кўпайган. Ҳозирда киберўғирлик ва киберфирибгарлик ҳолатларининг 96 фоизи электрон тўлов тизимлари орқали содир этилмоқда.

Назорат кучайтирилди

Кибержиноятларга қарши курашиш мақсадида Марказий банк, Ички ишлар вазирлиги ва Бош прокуратура ўртасида ҳамкорлик механизми йўлга қўйилган.

Яратилган махсус тизим орқали фуқаролар мурожаати келиб тушиши билан шубҳали операцияларни тўхтатиш ва банк карталарини қисқа вақт ичида блоклаш имконияти пайдо бўлган.

Мутасаддиларнинг айтишича, янги онлай платформанинг ишга туширилиши маблағларни ноқонуний айлантириш ҳолатларига тезкор чора кўриш имконини бермоқда.

1,7 трлн сўм сақлаб қолинди

Вазирлик маълумотига кўра, сўнгги беш ой давомида 1,7 триллион сўм маблағнинг ноқонуний равишда хорижга олиб чиқиб кетилишининг олди олинган.

Шунингдек, жиноятларга алоқадор деб топилган 10 минг 250 та банк картаси блокланган. Бу эса кибержиноятчиларнинг молиявий операцияларини чеклашга хизмат қилган.

Мирзохон Зубайдуллаевнинг билдиришича, 2026 йил давомида кибержиноятларни фош этиш кўрсаткичлари 3,5 баробарга, уларни аниқлаш самарадорлиги эса 5 баробарга ошган.