Колумбияда йўловчи самолёти қулаб тушди

Колумбияда давлатга қарашли Satena авиакомпаниясига тегишли Beechcraft 1900 русумли йўловчи самолёти ҳалокатга учради. Ҳодиса оқибатида бортда бўлган 15 нафар инсон — 13 йўловчи ва икки экипаж аъзоси ҳаётдан кўз юмган. Дастлабки маълумотларга кўра, самолёт парвоз вақтида алоқа узилганидан сўнг тоғли ҳудудга қулаган.

Парвоздан 12 дақиқадан сўнг алоқа узилган

Самолёт Кукута шаҳридаги Камило Даса аэропортидан маҳаллий вақт билан 11:42 да учиб чиққан. Парвоздан 12 дақиқа ўтиб, соат 11:54 да ҳаво кемаси билан охирги бор алоқа ўрнатилган. Шундан сўнг самолёт диспетчерлар назоратидан чиқиб кетган.

Ҳаво кемаси Окания муниципалитетида жойлашган Агуас-Кларас аэропортига маҳаллий вақт билан тахминан 12:05 да қўниши режалаштирилган эди. Самолётнинг сўнгги координаталари Плая-де-Белен ва Хакари муниципалитетлари орасидаги қийин релефли тоғли ҳудудда қайд этилган.

Текширувлар натижаси

Satena авиакомпанияси маълум қилишича, дастлабки текширувлар самолётда ёнилғи тугаб қолган бўлиши мумкинлигини кўрсатмоқда. Шунингдек, фавқулодда ҳолатларда автоматик ишга тушадиган радио майоқ сигнал бермагани маълум қилинган. Бу ҳолат қутқарув ишларини қийинлаштирган.

Қулаган самолёт қолдиқларини маҳаллий аҳоли аниқлаган. Ҳодиса жойига қутқарув хизматлари ва тергов гуруҳлари йўналтирилган. Айни пайтда фожиа сабабларини аниқлаш бўйича расмий суриштирув ишлари олиб борилмоқда.

Ҳалок бўлганлар орасида депутатлар ҳам бўлган

Маълумотларга кўра, ҳалок бўлганлар орасида Колумбия Конгресси Вакиллар палатаси депутати Диоген Кинтеро ҳамда депутатликка номзод Карлос Салседо ҳам бўлган. Марҳумларнинг яқинлари учун махсус ишонч телефони ташкил этилган.

Аввалроқ Ҳиндистонда бортида бош вазир бўлган самолёт қулаб тушиши натижасида 5 киши ҳалок бўлган эди.