Коррупцияга қарши курашиш агентлиги UzPost хусусийлаштирилишида шаффофликни талаб қилди

Коррупцияга қарши курашиш агентлиги «Ўзбекистон почтаси» акциядорлик жамиятидаги давлат улушини хусусийлаштириш жараёнидаги маълумотлар ва жараённи таҳлил қилиб, унинг шаффофлиги ва қонунийлигига оид расмий тақдимнома йўллади. Бу ҳақда агентлик ахборот хизмати маълум қилди.

Агентликнинг маълум қилишича, турли интернет нашрларида UzPost хусусийлаштирилишига оид материаллар эълон қилингач, миллий почта операторидаги давлат улушини сотиш жараёнидаги ҳуқуқий асослар ва амалий тартиб ўрганиб чиқилган.

Президент фармонларига кўра, «Ўзбекистон почтаси» АЖ трансформация қилиниши белгиланган йирик давлат корхоналари рўйхатига киритилган. Жамиятнинг 29,4 фоиз давлат улуши оммавий савдолар орқали хусусий инвесторларга таклиф этилиши режалаштирилган.

Амалдаги қонунчиликка мувофиқ, давлат активларини хусусийлаштириш жараёнлари очиқлик, ҳисобдорлик ва тенг рақобат муҳитини таъминлаш принципларига асосланиши шарт. Хусусан, «Давлат мулкини хусусийлаштириш тўғрисида»ги қонунга кўра, фуқаролар ва инвесторлар хусусийлаштирилаётган объектлар ҳақидаги ахборотга эркин кириш имкониятига эга бўлиши керак.

Шу билан бирга, Президентнинг ПФ–6247-сон Фармони ва Вазирлар Маҳкамасининг 572-сонли қарорида давлат улуши мавжуд ташкилотлар ҳақидаги маълумотлар Очиқ маълумотлар порталида жойлаштирилиши ва мунтазам янгиланиб борилиши белгиланган. Бу талаб бажарилмасдан объектларни сотувга қўйишга йўл қўйилмайди.

Агентлик ўрганиш якунлари бўйича Давлат активларини бошқариш агентлигига расман мурожаат қилиб, UzPost акцияларини хусусийлаштириш жараёнида қонунчиликда белгиланган шаффофлик ва ошкоралик принципларига тўлиқ риоя этилишини таъминлашни талаб қилди.

Эслатиб ўтамиз, «Ўзбекистон почтаси» АЖ хусусийлаштирилгани ҳақидаги хабарларни рад этган эди.

«Эсимиз борида этагимизни ёпайлик»: жамоатчилик фаоллари UzPost Россия компаниясига берилишига қарши фикрларини билдирган.