Кремл Россияни доллар ҳисоб-китобларига қайтаришни истаяпти – ОАВ
«Bloomberg» Россия томонининг ички ёзма ҳужжатини эълон қилди. Унда Украинадаги уруш тугаган тақдирда Россия ва АҚШ ўртасида мумкин бўлган ҳамкорликнинг еттита йўналиши баён этилган.
Кремл кенг қамровли иқтисодий шериклик доирасида АҚШ президенти Доналд Трамп маъмурияти билан ҳамкорлик қилиш орқали Россияни халқаро ҳисоб-китобларнинг доллар тизимига қайтаришни истамоқда. Бу ҳақда кеча, 12 феврал куни юқори лавозимли россиялик амалдорлар ўртасида тарқатилган ички ёзма ҳужжатга таяниб, «Bloomberg» агентлиги хабар берди.
2026 йил бошларида тузилган мазкур ҳужжатда Украинадаги урушни тўхтатиш бўйича келишувдан сўнг Россия ва АҚШ иқтисодий манфаатлари мос келиши мумкин бўлган еттита йўналиш батафсил баён этилган.
Мумкин бўлган ҳамкорлик йўналишлари
Жумладан, Россия самолёт паркини модернизация қилиш учун авиация соҳасида узоқ муддатли шартномалар тузиш ва АҚШнинг Россия авиасаноатида иштирок этиши масаласи тилга олинган. Ёзма ҳужжатда нефт ва суюлтирилган табиий газ соҳасида қўшма корхоналар тузиш таклиф этилган. Америка компанияларининг Россия истеъмол бозорига қайтиши учун имтиёзли шартлар кўзда тутилган.
Шунингдек, атом энергетикаси соҳасида, жумладан сунъий интеллект билан боғлиқ тармоқларда ҳамкорлик режалаштирилган. Бундан ташқари, литий, мис, никел ва платина каби хомашё ишлаб чиқариш соҳасида ўзаро ҳамкорлик назарда тутилган. Қазилма ёқилғини кам эмиссияли ечимларга муқобил сифатида илгари суриш бўйича қўшма иш олиб бориш ҳам эҳтимолий йўналиш сифатида қайд этилган.
Москва ва Пекин муносабатларининг сусайиши
Ҳужжатда Россияни, жумладан энергетика битимлари учун ҳам, доллар ҳисоб-китоб тизимига қайтариш имконияти алоҳида тилга олинган.
Россия мазкур ҳужжатдаги бирор параметрни АҚШга расман таклиф қилган-қилмагани номаълум. Россия президенти Владимир Путиннинг матбуот котиби Дмитрий Песков изоҳ сўровига жавоб бермаган.
«Bloomberg»нинг ёзишича, долларда ҳисоб-китобларга қайтиш Россияни яна Вашингтоннинг молиявий назорати остига қайтариш ва Россия иқтисодиётининг заифлигини камайтиришга қаратилган саъй-ҳаракатлардан воз кечишни англатади. Нашр қўшимча қилишича, бу қадам Доналд Трамп маъмурияти учун Москва ва Пекин ўртасидаги муносабатларни сусайтириш борасида ютуқ бўлиши мумкин.
«Дмитриев пакети»
Феврал ойи бошида Украина президенти Владимир Зеленский Россия ва АҚШ Киев билан тинчлик музокаралари билан бир вақтда кенг кўламли икки томонлама иқтисодий келишувларни ҳам муҳокама қилаётганини маълум қилди.
Зеленский Кремл музокарачиси шарафига «Дмитриев пакети» деб атаган Москва таклифи ҳақидаги маълумот Украина разведкаси томонидан тўпланган. Кремл музокарачиси Кирилл Дмитриев айни пайтда Россия Тўғридан тўғри инвестициялар жамғармасига ҳам раҳбарлик қилади.
