Криштиану Роналду ҳаётидаги энг қиммат хариди — фотолар
Португалия терма жамоаси ва Саудиянинг «Ан-Наср» клуби юлдузи Криштиану Роналду ўзининг ҳаётидаги энг қиммат сотиб олишини айтиб берди — у бу харидни 13 йил аввал амалга оширган.
Португалиялик футбол юлдузи Криштиану Роналду Пирс Морган билан суҳбатида ҳаётидаги энг қиммат хариди хусусий самолёт бўлганини маълум қилди.
«Мен илк самолётимни 13 йил аввал сотиб олганман. Бир йил аввал уни янгисига алмаштирдим. Ҳа, бу анча қиммат туради. Менда Global Express модели бор», — деди Роналду.
Испаниянинг Marca нашрининг ёзишича, Роналду ўшанда Gulfstream G200 самолётини харид қилиш учун 20 млн евро тўлаган. Кейинчалик футболчи Bombardier Global Express 6500 моделини харид қилган, унинг баҳоси тахминан 50 млн еврони ташкил этган.
Бошқа манбаларга кўра, Роналдунинг янги самолётининг ичи люкс даражада жиҳозланган — унда 13 та ўриндиқ, Wi-Fi, ёруғликни бошқариш тизими ва мини-ошхона мавжуд.
2025 йил октябрида 40 ёшли Роналду Bloomberg миллиардерлар индексида биринчи марта миллиард долларлик активга эга бўлган футболчи сифатида қайд этилган. Ҳозир унинг бойлиги тахминан 1,4 млрд долларга етган.
Роналду беш карра «Олтин тўп» соҳиби, беш марта Чемпионлар лигаси ғолиби ва расмий ўйинларда тарихдаги энг кўп гол урган футболчи сифатида танилган. Унинг молиявий ва спорт ютуқлари уни замонавий футболнинг энг муваффақиятли шахсларидан бирига айлантирган.
